رووداو دیجیتاڵ
پەیامنێری رووداو لە بەغدا دەڵێت، ئەسعەد شەیبانی، وەزیری دەرەوەی سووریا بە سەردانێکی فەرمی گەیشتە بەغدا. بڕیارە لەگەڵ فوئاد حوسێن، وەزیری دەرەوەی عێراق و بەرپرسانی دیکەی حکومی کۆببێتەوە.
زیاد ئیسماعیل، پەیامنێری رووداو لە بەغدا دەڵێت، یەکێک لەو پرسانەی وەزیری دەرەوەی سووریا لەگەڵ بەرپرسانی بەغدا تاوتوێی دەکات، پرسی سنوور و جموجۆڵی داعشە لە ناوچە سنوورییەکان. ئەوە لەکاتێکدایە، عێراق نزیکەی 600 کیلۆمەتر سنووری هاوبەشی لەگەڵ سووریا هەیە.
بڕیاربوو ئەسعەد شەیبانی، وەزیری دەرەوەی سووریا رۆژی 20-02-2025، سەردانی بەغدا بکات، بەڵام سەردانەکە دواخرا، ئەوەش لەبەر ئەوەی بەشێکی هێزەکانی چوارچێوەی هاوئاهەنگی تێبینییان لەسەر دەسەڵاتدارانی ئێستای سووریا هەیە.
رۆژی 21ـی شوباتی 2025 نووسینگەی راگەیاندنی وەزارەتی دەرەوەی عێراق رایگەیاند: "بە فەرمیی بانگهێشتی ئەسعەد شەیبانی، وەزیری دەرەوەی سووریامان کردووە بۆ سەردانیکردنی عێراق، ئەوەش بەمەبەستی تاوتوێکردنی چەند دۆسیەیەکی هاوبەش و کردنەوەی لاپەڕەیەکی نوێ لە پەیوەندییەکانی هەردوو وڵات."
چاوەڕوان دەکرێت وەزیری دەرەوەی سووریا سەردانی هەولێریش بکات و لەگەڵ بەرپرسانی هەرێمی کوردستان کۆببێتەوە.
رۆژی 15ی شوباتی 2025، دڵشاد شەهاب، گوتەبێژی سەرۆکایەتیی هەرێمی کوردستان بە رووداوی گوت: "ئەسعەد شەیبانی، وەزیری دەرەوەی سووریا لەلایەن نێچیرڤان بارزانی، سەرۆکی هەرێمی کوردستانەوە بانگهێشتکراوە بۆ هەولێر و ئەویش بە خۆشحاڵییەوە بانگهێشتەکەی قبووڵ کردووە."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ