رووداو دیجیتاڵ
موقتەدا سەدر، رابەری رەوتی سەدر لە عێراق رایگەیاند، پێشوازی لە سەردانییەکەی پاپای ڤاتیکان بۆ عێراق دەکات و هەموو شوێنکەوتووانی محەممەدی دوا پێغەمبەر لە ئاشتی و ئیسلامدا برای ئەون.
موقتەدا سەدر، شەوی شەممە 2021/02/13 لە هەژماری خۆیدا لە تۆڕی کۆمەڵایەتی تویتەر رایگەیاند: "پێم گەیشتووە کەوا چەند کەسێک دژی سەردانەکەی پاپان بۆ عێراقی خۆشەویستمان. بۆیە دەڵێم کرانەوە بە رووی ئایینەکاندا شتێکی باشە و سەردانییەکەی بۆ عێراق پێشوازیی لێ دەکرێت. دڵیشمان پێش دەرگاکانمان بۆی کراوەن. نەجەفی پیرۆز پایتەختی ئایینەکانە، بۆیە بە خێر بێت وەک هەوادارێکی ئاشتی."
موقتەدا سەدر هەر لە تویتەکەیدا دەڵێت: "سڵاوی خودا لە شوێنکەوتووانی عیسا پێغەمبەری خودا و تەنانەت شوێنکەوتووانی مووسا پێغەمبەری خودا بێت. ئەگەر دوژمنایەتیی خۆیان بۆ ئایینەکان رانەگەیەنن، وەک قەوارەی زایۆنیزم، هەروەها هەموو شوێنکەوتووانی محەممەد دوا پێغەمبەر لە ئاشتی و ئیسلامدا برای ئێوەن. سڵاوێک لە منیشەوە، لەگەڵ میهرەبانیی خودا بۆ هەموو هەوادارانی ئاشتی."
نووسینگەی راگەیاندنی ڤاتیکان لە 8ـی شوباتی 2021ـدا، بەرنامەی کاری سەردانەکەی پاپا فرانسیس، پاپای ڤاتیکانی بۆ عێراق و هەرێمی کوردستان بڵاوکردەوە و راگەیاند، پاپا لە 5ـی ئاداری 2021ـەوە تاوەکو 8ـی ئەو مانگە سەردانی بەغدا، شاری ئوور، نەجەف، هەولێر، موسڵ و قەرەقووش لە پارێزگای نەینەوا دەکات.
نووسینگەی راگەیاندنی ڤاتیکان ئاشکرایشی کرد، پاپا لە 5ـی ئاداردا رۆما جێدەهێڵێت و لە فڕۆکەخانەی نێودەوڵەتیی بەغدا مستەفا کازمی، سەرۆکوەزیرانی عێراق پێشوازیی لێدەکات. پاشان بەرەو کۆشکی سەرۆکایەتیی بەڕێدەکەوێت و رێورەسمی پێشوازیی بۆ رێکدەخرێت و لەگەڵ بەرهەم ساڵح، سەرۆککۆمار و دواتریش لەگەڵ بەرپرسانی دیکە و نوێنەرانی کۆمەڵگەی مەدەنی و دیپلۆماتکاران کۆدەبێتەوە، پێش ئەوەی بەرەو کڵێسای سەیدە نەجاتی سریانیی کاسۆلیک لە بەغدا بەڕێبکەوێت و لەگەڵ پیاوانی ئاینی کۆببێتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ