کۆمیسیۆن 14 سکاڵا لە دژی حەلبووسی یەکلایی دەکاتەوە و سکاڵایەکیش لەدژی تۆماردەکات

 

کۆمیسیۆنی باڵای سەربەخۆی هەڵبژاردنەکانی عێراق ئەو 14 سکاڵایەی لەسەر محەممەد حەلبووسی، سەرۆکی لەسەر کاردوورخراوەی پەرلەمانی عێراقی یەکلاییکردووە، دوای پۆڵینکردنی سکاڵاکان، بەشێکی هێشتنەوە و بڕیاریدا سکاڵا لەسەر حەلبووسی تۆمار بکات.

 

ئەو سکاڵایانەی کۆمیسیۆن رەتیکردوونەتەوە پەیوەندیان بە هەڕەشەکردن، هێرشکردن، جنێودان و قسە پێگوتن، هەروەها بەشێکیشیان داواکاری بوون بۆ هەڵوەشاندنەوەی پارتی تەقەدووم کە محەممەد حەلبووسی سەرۆکایەتی دەکات، بەڵام ئەو سکاڵایانەی لەسەر حەلبووسی بە پاساوی ناردنە دەرەوەی پارە بۆ دەرەوە هەبوون پەسندی کردن و بڕیارە بەپێی یاسای پارتە سیاسییەکانی عێراق سکاڵای لەسەر تۆمار بکات.

 

رۆژی چوارشەممە، 13-12-2023، د.هیمان تەحسین، بەڕێوەبەرى گشتیی فەرمانگەى پارت و رێکخراوە سیاسییەکانى سەر بە کۆمیسیۆنى باڵاى سەربەخۆى هەڵبژاردنەکانى عێراق، بەتۆڕی میدیایی رووداوی گوت، "بەهۆی ئەوەی ئەو پارە ناردنە دەرەوەی عێراق بەبێ ئاگاداری ئێمە بووە، بۆیە پێشێلکردنی مادەکانی 24، 25، 41 و 50ـی یاسای پارتە سیاسییەکانە و ئێمە بەم نزیکانە لە دادگەی لێکۆڵینەوەی بەغدا سکاڵای لەسەر تۆماردەکەین."

 

دوێنێ سێشەممە، 12-12-2023، ئەنجوومەنی کۆمیسیارانی عێراق، لە کۆبوونەوەیەکدا بڕیارەکانی فەرمانگەى پارت و رێکخراوە سیاسییەکانى سەر بە کۆمیسیۆنى باڵاى سەربەخۆى هەڵبژاردنەکانى عێراقی پەسندکرد کە ئەمانەبوون:

 

- تۆمارکردنی سکاڵا لە دژی محەممەد حەلبووسی، سەرۆکی پارتی تەقەدووم بەپێی حوکمەکانی مادەی 50ـی پارتە سیاسییەکانی ژمارە 36ـی ساڵی 2015.

- رەتکردنەوەی داواکانی هەڵوەشاندنەوەی پارتی تەقەدووم بەهۆی نەبوونی بەڵگەی تەواو و پێویست.

- رەتکردنەوەی سکاڵاکانی تایبەت بە هێرشکردن و سەرپێچیکردن و هەڕەشەکردن.

 

بەپێی ئەو بەڵگەنامانەی بڵاوکراونەتەوە، پارتی تەقەدووم گرێبەستی لەگەڵ کۆمپانیای (BGR)ـی ئەمریکی کردووە بۆ پێدانی راوێژکاریی سەرکردایەتی و سیاسی و بابەتی جۆراوجۆر کە بەپێی گرێبەستەکە ساڵانە 600 ملیۆن دۆلاریان بۆ کۆمپانیاکە ناردووە، بەشێک لەلایەنە شیعەکانیش دەڵێن، پشکێکی کۆمپانیاکە ئیسرائیلییە، بەو هۆیەوە و بەپاساوی پێشێلکردنی یاسای قەدەخەکردنی ئاساییکردنەوەی پەیوەندی لەگەڵ ئیسرائیل، ژمارەیەک سکاڵای لەسەر تۆمارکرا.

 

رۆژی سێشەممە، 15-11-2023، بەپاساوی ساختەکاری، دادگەی باڵای فیدراڵیی عێراق ئەندامێتیی محەممەد حەلبووسی لە پەرلەمان هەڵوەشاندەوە و رایگەیاند، "ئەمە بڕیاری کۆتاییە و پێویستە هەموو دەسەڵاتەکان پێوەی پابەند بن."

 

رۆژی 30-11-2023، محەممەد حەلبووسی، سەرۆکی پارتی تەقەدووم لە کۆنفرانسێکی رۆژنامەڤانیدا سەرجەم ئەو تۆمەتانەی رەتکردەوە کە دراونەتەپاڵی، بەتایبەت ئەوەی گوایە لەگەڵ کۆمپانیایەکی ئەمریکی گرێبەستی کردووە نزیکە لە ئیسرائیلەوە و ئەوەش بەپێی یاسای قەدەخەکردنی ئاساییکردنەوەی پەیوەندییەکان لەگەڵ ئیسرائیل قەدەخەکراوە، حەلبووسی گوتی، "رایدەگەیێنم، عێراق جێناهێڵم، هەر لە عێراق دەمێنمەوە و هەر کاتێک دادگە بانگهێشتم بکات، دەچم و ئامادەی دادگەییکردن دەبم."