واژۆکردنی گرێبەستەکان.
رووداو دیجیتاڵ
وەزارەتی نەوتی عێراق دوای تێپەڕبونی پێنج ساڵ، گەڕی شەشەمی پێدانی مۆڵەتی دۆزینەوە و دەرهێنانی نەوت و گازی بە کۆمپانیاکان بەڕێوەبرد.
لە ماوەی سێ رۆژ و لە کۆی 29 کێڵگەی نەوت و گاز، 13 گرێبەست واژۆکران.
حەیان عەبدولغەنی، وەزیری نەوتی عێراق رایگەیاند: "ئەم کێڵگانە ئینشەڵڵا یەدەگی نەوتی زیاد دەکەن. کاری چڕ هەیە بۆ زیادکردنی یەدەگ؛ ئێستا یەدەگی نەوتی نزیکەی 140 ملیار بەرمیلە. توێژینەوەکان دەڵێن، بەم گرێبەستانە بۆ نزیکەی 160 ملیار زیاد دەکات."
کۆمپانیای کارگرووپ کە بارەگا سەرەکییەکەی لە هەرێمی کوردستانە، تاکە کۆمپانیای عێراقی بوو؛ لەکۆی 13 گرێبەست، سێیانی بردەوە. ئەوانیش کێڵگە نەوتییەکانی دیما لە عەمارە - ساسان و عەلان لە نەینەوا و کێڵگەی خڵێسیە لە پارێزگای ئەنبار.
هاوڕێ مەنسور بەگ، نوێنەری کۆمپانیای کار دەڵێت: "سێ پرۆژەی سەرەکیمان وەرگرت، بەڵام یەکێک لە پرۆژەکان دوو کێڵگەی نەوتی تێدایە کێکیان پرۆژەی کێڵگەی نەوتی دیما کە پێشبڕکێیەکە سەختی لەسەر بوو. لەبەرامبەر حەوت کۆمپانیای بەهێزی نێو دەوڵەتی پێشبڕکێمانکرد و بردمانەوە لەو پێشبڕکێیە."
لە گەڕی شەشەمی مۆڵەتدان بە کۆمپانیا نەوتییەکان بۆ دۆزینەوە و دەرهێنانی نەوت و گاز 21 کۆمپانیای بیانی بەشداربوون. بە 10 گرێبەست پشکی شێر بەر کۆمپانیاکانی چین کەوت.
هەوڵەکانی حکومەتی عێراق بۆ گرینگیدان بە کێڵگە نەوتی و گازییەکانی و زیادکردنی بەرهەمە نەوتیەکان لەکاتێکدایە کە وا 13 مانگە هەناردە کردنی رۆژانە 450 هەزار بەرمیل نەوتی هەرێمی کوردستان راگیراوە بەمەش زیانی زیاتر لە 13 ملیار دۆلاری بە خەزێنەی گشتی گەیاندوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ