لە بەغدا لە رێگەی خەواندنی موگناتیسییەوە دزی لە دۆلارفرۆشێک دەکرێت
رووداو دیجیتاڵ
پۆلیسی بەغدا رایگەیاند سێ کەسیان بەتۆمەتى بردنى سێ هەزار دۆلار لە دووکانێکى ئاڵۆگۆڕى دراو دەستگیرکردووە، کە خاوەنی دووکانەکەیان لە رێگەى خەواندنى موگناتیسییەوە خەواندووە و دزییەکەیان لێکردووە.
12ی ئایارى 2022 فەرماندەیی پۆلیسی بەغدا لە راگەیێندراوێکدا وردەکاریى رووداوەکە و دەستگیرکردنى ئەو سێ کەسەى بڵاوکردەوە و ئاماژەى بەوەداوە، ئەو سێ تۆمەتبارە خاوەنى دووکانێکى ئاڵوگۆڕى دراویان لە رێگەى خەواندنى موگناتیسییەوە خەواندووە و بڕى سێ هەزار دۆلاریان لێ بردووە.
فەرماندەیی پۆلیسی بەغدا ئاماژەى بەوەداوە، خاوەنى دووکانەکە لە پۆلیس سکاڵاى لە دژى ئەو سێ کەسە تۆمارکردووە و گوتوویەتی: "خەواندوویانم و پارەکەیان لێ بردووم".
ئەو سێ کەسە لەلایەن کارمەندانى فەوجى پۆلیسی فریاکەوتنەوە دەستگیرکراون و پارەکەیان لێ وەرگیراوەتەوە، دواتر دۆسیەکەشیان رەوانەى پۆلیسی نەهێشتنى تاوان کراوە بۆ گرتنەبەرى رێوشوێنى یاسایی لە دژیان.