سوودانی: ئامانجێکی چوونمان بۆ واشنتن راگەیاندنی کاتی کۆتاییهێنانی ئەرکی هاوپەیمانیی نێودەوڵەتییە

 

ئەمڕۆ شەممە، 13ـی نیسانی 2024، محەممەد شیاع سوودانی، سەرۆکوەزیرانی عێراق لە گوتارێکدا گوتی، لەسەر بانگهێشتی فەرمیی جۆزێف بایدن، سەرۆکی ویلایەتە یەکگرتووەکانی ئەمریکا، بە سەرۆکایەتیی شاندێکی حکومی، پەرلەمانی و سەرمایەدارانی کەرتی تایبەت دەچێتە ئەمریکا. 

 

سوودانی رایگەیاند، ئەم سەردانە لە کاتێکی هەستیاردایە بۆ پەیوەندییە دوو قۆڵییەکانی نێوان عێراق و ئەمریکا و گوتی، "ئامانج لەم سەردانە، گەیاندنی ئاستی پەیوەندییەکانی نێوان عێراق و ئەمریکایە بۆ قۆناخێکی نوێ کە زامنی جێبەجێکردنی بڕگە و مادەکانی رێککەوتنی ستراتیژی بکات، بەو جۆرەی لەگەڵ کارنامەی حکومەتەکەمان گونجاو بێت کە جەخت لە چاکسازییەکان لە بوارەکانی ئابووری، دارایی، بانکی و هاوبەشیی ئابووری لەگەڵ وڵاتانی ناوچەکە و جیهان دەکاتەوە".

  

سەرۆکوەزیرانی عێراق ئاماژەی بەوەشکرد، "لە دیدارەکەماندا لەگەڵ جۆ بایدن گفتوگۆ لەبارەی دۆخی ناوچەکە و زیادبوونی گرژییەکان دەکەین. هاوکات باس لە رۆڵی هاوبەشمان دەکەین، بەتایبەتی دوای رووداوەکانی حەوتی ئۆکتۆبەر و گرنگیدانمان بە راگەیاندنی ئاگربەست و کۆتاییهێنان بە جەنگ و رێگەنەدان بە فراوانبوونی بازنەی ناکۆکییەکان لە ناوچەی رۆژهەڵاتی نێوەڕاست".

سەرۆکوەزیرانی عێراق باس لەوە دەکات، "لە دیدارەکەدا تیشک دەخرێتە سەر کاری لیژنەی باڵای سەربازی کە کارەکانی لەنێوان عێراق و هاوپەیمانیی نێودەوڵەتی نزیکەی دوو مانگ بەر لە ئێستا دەستیان پێکرد. ئەم گفتوگۆیە زۆر گرنگە کە ئامانج لێی گەیشتنە بە خشتەی کات بۆ کۆتاییهێنان بە ئەرکی هاوپەیمانیی نێودەوڵەتی و گواستنەوەی پەیوەندییەکان بۆ ئاستی پەیوەندییە دوو قۆڵییەکان لەنێوان عێراق و وڵاتانی ئەندام لەم هاوپەیمانێتییە".

 

سوودانی دەڵێت، "لەم سەردانەدا یەکەم کۆبوونەوەی لیژنەی باڵای هاوئاهەنگی هاوبەش کە بە HCC ناسراوە، ئەنجام دەدرێت کە پەیوەندیدارە بە جێبەجێکردنی رێککەوتننامەی ستراتیژی. لەو کاتەوە رێککەوتن بۆ پێکهێنانی ئەم لیژنەیە کراوە، هیچ کۆبوونەوەیەک بۆ جێبەجێکردنی بڕگە و مادەکانی رێککەوتنەکە نەکراوە. لەسەر ئاستی عێراق ژمارەیەک وەزیر و بەرپرس بەشدار دەبن و پێش ئەم سەردانەش ئامادەکاری کراوە. لەم کۆبوونەوەیەدا دۆسیەکانی بازرگانی، وزە، وەبەرهێنان، گواستنەوە و گەیاندن، پەروەردە و فێرکردن، کولتوور، بەرەنگاربوونەوەی گەندەڵی و گەڕاندنەوەی پارە و سامانی گشتی دەخرێنە بەرباس و لێکۆڵینەوە". 

 

سەرۆکوەزیرانی عێراق ئاماژەی بەوەش کرد کە لەم سەردانەدا دیداریان لەگەڵ وەزیرانی دەرەوە، بەرگری و گەنجینە؛ هەروەها راوێژکاری ئاسایشی نیشتمانی، ژووری بازرگانیی ئەمریکی و ژمارەیەک سەرۆک و بەڕێوەبەرانی کۆمپانیا نەوتی و پیشەسازییە گەورەکانی ئەمریکی دەبێت؛ دواتر لەگەڵ رەوەندی عێراقی لە ئەمریکا کۆدەبێتەوە.

 

گوتیشی، "نێوەڕۆکی سەردانەکەمان نیشاندانی خواستی عێراق دەبێت لە بونیاتنانی هاوبەشی ستراتیژی بەردەوام لەنێوان ئەمریکا و عێراق لەسەر بنەمای رێزگرتنی دوولایەنە، پاراستنی ئاسایش و یەکپارچەیی خاکی عێراق و سەروەرییەکانی. لەسەر کۆی ئەم دۆسیانە کاردەکەین لەپێناو بەرژەوەندییە باڵاکانی عێراق". 

 

بڕیارە رۆژی 15ی ئەم مانگە محەممەد شیاع سوودانی و جۆ بایدن لە کۆشکی سپی کۆببنەوە.