شاندێکی تورکیا سەردانی عێراق دەکات
رووداو دیجیتاڵ
عومەر پۆڵات، وەزیری بازرگانیی تورکیا بە سەرۆکایەتیی شاندێک سەردانی عێراق دەکات. سەردانەکە بۆ پەرەدان بە پەیوەندیی ئابووریی هەردوو وڵاتە.
محەممەد حەنوون، گوتەبێژی وەزارەتی بازرگانیی عێراق رۆژی شەممە 12-10-2024 بە تۆڕی میدیایی رووداوی راگەیاند، شاندێکی تورکیا لە رۆژانی 18 و 19 ئەم مانگە سەردانی عێراق دەکات.
شاندەکە رۆژی 18ی مانگ دەچێتە بەغدا و رۆژی 19 مانگ سەردانی بەسرە دەکات.
گوتەبێژی وەزارەتی بازرگانیی عێراق گوتی، سەردانەکە لەسەر داواکاری محەممەد تەمیم، جێگری سەرۆکوەزیران و وەزیری پلاندانانە؛ ئاماژەی بەوەشکرد، لە کۆبوونەوەکەدا وەزیرانی ئاوەدانکردنەوە و نیشتەجێکردن و سەرچاوەکانی ئاو ئامادە دەبن و لەگەڵ کۆمپانیا بەڵێندەرایەتییەکانی تورکیا کۆدەبنەوە.
محەممەد حەنوون باس لەوەش دەکات، هەر لە سەردانەکەدا ئەنجوومەنی کاری عێراقی- تورکی و یەکێتی ژوورە بازرگانییەکان و یەکێتیی ژوورە پیشەوەرییەکانی عێراق و یەکێتی بەڵێندەرانی عێراق کۆدەبنەوە.
قەبارەی بارزرگانی نێوان عێراق و تورکیا لە ساڵی 2023دا 20 ملیار دۆلار بوو.کۆمپانیاکانی تورکیا 1101 پرۆژە لە هەرێمی کوردستان و عێراق جێبەجێ دەکەن.