پەرلەمانى عێراق دەست بە کۆبوونەوەکانی دەکاتەوە

 

رۆژی 12ـی تەمموزى 2023 پەرلەمانى عێراق خشتەى دوو کۆبوونەوەى راگەیاند، لە رۆژانى 15 و 17ـی تەممووز، ئەمەش لەدواى دەستپێکردنى وەرزى دووەمى ساڵى دووەمى یاسادانانى پەرلەمان.

 

بەگوێرەى راگەیێندراوێکى میدیاى پەرلەمانى عێراق، لە کۆبوونەوەى 15ـی تەممووزدا، پەرلەمان خوێندنەوەى یەکەم بۆ حەوت پڕۆژەیاسا دەکات، کە بریتین لە پڕۆژەیاساکانى: سندووقى نیشتەجێکردن، قەرەبووى نەخۆشانى کەمیی بەرگرى، هەموارى یاساى وەزارەتى خوێندنى باڵا و توێژینەوەى زانستى، هەموارى دەستەى باڵاى دەریایی عێراق، هەموارى یاساى پەیوەندیکردنى عێراق بە رێککەوتنى نێودەوڵەتى هێڵەکانى گواستنەوە، پەیوەندیکردنى عێراق بە سیستمى بنەڕەتیی ئەنجوومەنى نێودەوڵەتیى خورما و پەیماننامەى رێککەوتنى نێوان عێراق و ئەرمینیا بۆ هەڵگرتنى ڤیزا.

 

هەروەها لە کۆبوونەوەى 17ـی تەممووز، خوێندنەوەى یەکەم بۆ پێنج پڕۆژەیاسا دەکرێت، کە بریتین لە پڕۆژەیاساکانى: هەموارى یاساى دەستەى سکاڵاکانى موڵکدارى، دەزگاى هەواڵگریى نیشتیمانى، دەزگاى بنبڕکردنى تیرۆر، کۆلێژى فڕۆکەوانیى سوپا، رێککەوتنى هەڵگرتنى ڤیزاى پاسپۆرتى دیپلۆماسی نێوان عێراق و رووسیا.

 

 لە 12ـی حوزەیرانى 2023، پەرلەمانى عێراق لەدواى پەسندکردنى یاساى بودجەى گشتى، پشووى وەرزى یەکەمى دەستپێکرد و لە 9ـی تەمموز کۆتایی بە پشووەکە هێنا.