عەبدولخالق تەلعەت: لیوا هاوبەشەکان لەگەڵ پێکهێنانی حکومەتی عێراقدا کارا دەبن

لیوا عەبدولخالق تەلعەت، نوێنەری حکومەتی هەرێمی کوردستان لە فەرماندەیی هێزە هاوبەشەکانی عێراق بە رادیۆی رووداوی راگەیاند: "هەموو کارەکانی لیوا هاوبەشەکان تەواو بووە تەنیا کێشەی دابینکردنی مووچەی ماوە کە دەبێت بڕیارەکەی واژۆ بکرێت. چاوەڕێی ئەوەین کە سەرۆککۆمار و سەرۆکوەزیران هەڵبژێردرێن، چونکە ئەم حکومەتەی ئێستا کاربەڕێکەرە و ناتوانێت بڕیار لەسەر بودجە و مووچە بدات. ئەو لیوایانە لەگەڵ پێکهێنانی حکومەتدا کارا دەبن."

 

نوێنەرەکەی حکومەتی هەرێمی کوردستان ئەوەی خستەڕوو، عێراق لەبەر ئەوەی تواناکەی بەسەر چەندین جۆر هێزدا دابەش و پەرت بووە، ناتوانێت بە باشی و رێکوپێکی رووبەڕووی داعش ببێتەوە، بۆیە هانای بۆ هێزەکانی پێشمەرگە هێناوە.

 

لیوا عەبدولخالق تەلعەت ئاماژەی بەوەش دا، مەترسییەکانی داعش بە هیچ شێوەیەک تەواو نابن، کەم و زیاد دەکەن، بەڵام دواییان نایەت. رۆژانە دەبینین کە چەکدارەکانیان لە نێوەڕاستی عێراق بە تایبەتی لە سنووری پارێزگای دیالە هێرش دەکەن و پەلاماری هێزە ئەمنییەکان دەدەن. 

 

بەگوتەی نوێنەری حکومەتی هەرێمی کوردستان لە فەرماندەیی هێزە هاوبەشەکانی عێراق، چەکدارانی داعش ئەگەر بتوانن و دەرفەتیان بۆ بڕەخسێت، هێرش دەکەنە سەر هێزەکانی پێشمەرگەیش.

 

لیوا عەبدولخالق گوتیشی: "ئەو بۆشاییە سیاسییەی دوای هەڵبژاردن دروست بووە و نەتوانراوە حکومەت پێکبهێنرێت، هۆکارێکە کە داعش زیاتر هێزی خۆی کۆ بکاتەوە و هەوڵ بدات پەلاماری هێزە ئەمنییەکانی عێراق بدات."

 

باسی لەوەیش کرد کە هۆکارێکی دیکە ئەوەیە هێزە سەربازییەکانی هاوپەیمانان لەسەر زەوی بەشداریی چالاکییە سەربازییەکان ناکەن و تەنیا بە ئاسمانی بەشدار دەبن.