رووداو دیجیتاڵ
عێراق پێشکێشکردنى داواکاریى مووچەى چاودێریکارى بریندارانى سوپاى دەستپێکرد کە لەنێوان 150 بۆ 250 هەزار دینار دەبێت. بە گوتەى جێگرى سەرۆکى لیژنەى ئاسایش و بەرگریى پەرلەمانى عێراق، ئەو مووچەیە سەربازە بریندارەکانى هەرێمى کوردستانیش دەگرێتەوە.
وەزارەتى بەرگریى عێراق دەستى بە وەرگرتنى داواکاریى ئەو کەسانە کرد کە دەیانەوێت مووچەى چاودێریکارى بریندارانى سەرباز و ئەفسەرانى سوپاى وەربگرن، ئەوەش بەرامبەر چاودێریکردنى تەندروستییان لە ماڵەوە.
بەگوێرەى راگەیێندراوێکى ئەو وەزارەتە، پێشکێشکردنى ئەو داواکارییانە لە 10ى تیشرینى دووەمەوە دەستى پێکردووە، کە بە شێوەى ئەلیکترۆنى و لە رێگەى بەستەرێکەوە دەبێت و هەموو عێراق دەگرێتەوە.
سەگڤان سندى، جێگرى سەرۆکى لیژنەى ئاسایش و بەرگریى پەرلەمانى عێراق بە تۆڕى میدیایی رووداوى گوت، "ئەو مووچەیە کەسوکارى ئەو سەربازە بریندارانەى سوپاى ئێستا و پێشووى عێراق دەگرێتەوە کە خەڵکى هەرێمى کوردستانن، بریندار بوون و بەهۆیەوە تواناى کارکردنیان نەماوە."
وەزارەتە بەرگریى عێراق ئاماژەى بەوە داوە، ئامانج لەو هەنگاوە هاوکاریکردنى بریندارانى سوپایە لە رێگەى دەستبەرکردنى مووچە بۆ ئەو کەسانەى چاودێرییان دەکەن کە سەربازانى بریندارى سوپای ئێستا و پێشوو دەگرێتەوە.
مووچەکە ئەو کەسانە دەگرێتەوە کە کەسی پلەیەکى بریندارەکەن؛ بڕى مووچەکە لەنێوان 150 بۆ 250 هەزار دینار دەبێت. دایک و باوک و هاوژین،کوڕ و کچ، خوشک و برا و باپیر و داپیرەو نەوەکانى بریندارەکە دەتوانن ئەو داواکارییە پێشکێش بکەن، بەو مەرجەى کەسی بریندار رێژەى کەمئەندامییەکەى 75% بێت.
سەگڤان سندى رایگەیاند، پارەى ئەو هاوکارییە لەسەر بودجەى بەکاربردنى وەزارەتى بەرگرى دەدرێت. دواى پێشکێشکردنى داواکارییەکان، لێکۆڵینەوە لە ناوى بریندارەکە و ئاستى کەمئەندامێتیەکەى دەکەن لەگەڵ ئەو کەسانەى دەیانەوێت وەک چاودێریکارى مووچە وەربگرن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ