شانەی راگەیاندنی ئەمنیی عێراق: سەرکردەیەکی داعش لە ئەنبار دەستگیرکرا

 

ئەمڕۆ یەکشەممە، 11ـی ئابی 2024، شانەی راگەیاندنی ئەمنیی عێراق رایگەیاند، "هێزەکانی بەڕێوەبەرایەتی هەواڵگری سەربازیی ئەنبار لە ئۆپەراسیۆنێکدا توانیویانە جێگری والی فوڕات کە ناسراوە بە ئەبو سەفییە عێراقی لە قەزای روممانە دەستگیر بکەن."

 

شانەکە ئەوەشی راگەیاندووە، "ئەبو سەفییە بەشداری لە چەندین کردەی تیرۆریستی لە عێراق و سووریا کردووە و بەگوێرەی مادەی 4ـی تیرۆر داواکراو بووە؛ دوای دەستگیرکردنیشی رادەستی یاسا کراوە."

 

بەگوێرەی ئامارەکان، تەنیا لەم مانگەدا 16 چەکداری داعش لە عێراق لەلایەن هێزە ئەمنییەکانەوە دەستگیرکراون.

 

بەپێی توێژینەوەیەکی سەنتەری رافیدەین بۆ دیالۆگ، کە سەنتەرێکی عێراقییە، لە ساڵی رابردوودا داعش 189 هێرشی لە ناوچە جیاجیاکاندا کردووە.