لە بەسرە پیاوێک هەوڵدەدات نێرگەلە بداتە خوشکەزاکەی و باوکی منداڵەکەش سکاڵا تۆمار دەکات

 

رۆژی دووشەممە، 11-7-2022، مالیک عەباس موراد، لەدایکبووی 1986 و دانیشتووی گەڕەکی قبلەت شوهەدای شاری بەسرەی عێراقە، لەبارەی ئەو گرتە ڤیدیۆییە بە تۆڕی میدیایی رووداوی گوت: "بەهۆی کێشەیەکی زۆر بچووک کە دواتر گەورە کرا ماوەی نزیکەی ساڵێک دەبێت من و هاوژینەکەم جیابووینەتەوە، دواتر دادگە منداڵەکەی لێوەرگرتمەوە و ئەرکی بەخێوکردنی بە دایکی دا کە لەلای برایەکی بەناوی حوسێن رەحیم دەژی، بەڵام ئەم پیاوە کە لە گرتە ڤیدیۆییەکەدا دەردەکەوێت تووندوتیژی لە دژی منداڵەکەم بەکاردەهێنرێت و شتی دیکەشی بەرامبەر دەکات، ئەمەش تەنیا بۆ هەراسانکردنی منە."

 

بەپێی ئەو گرتە ڤیدیۆییەی بڵاوکراوەتەوە منداڵێک کە تەمەنی ساڵێک کەمترە لەگەڵ کەسێکدا دەردەکەوێت و ئەو کەسە کە گوایە خاڵی منداڵەکەیە دووکەڵی نێرگەلەی بە دەموچاودا دەکات و هەوڵدەدات نێرگەلەی پێبدات و بیکێشێت، بە جۆرێک مژ لە نێرگەلەکەی دەکات و دوترا دووکەڵەکەی دەکاتە نێو دەمی منداڵەکە.

 

مالیک کە فەرمانبەری وەزارەتی ناوخۆیە و لە فەرمانگەیەکی بەغدا دەوام دەکات، داوای بە هاناوەچوون دەکات و دەڵێت: "داواکارم هەر کەسێک دەتوانێت بەرگریم لێبکات بەهانامەوە بێت، چونکە ئەو منداڵەم تووندوتیژی بەرامبەر دەکرێت و داوا لە سەرۆکوەزیرانی عێراق و وەزیری داد و ناوخۆ دەکەم بێنە سەر خەت، ئەم ناهەقییە قبووڵ نەکرێت و داوا لە رێکخراوی مافەکانی مرۆڤ و مافەکانی منداڵیش دەکەم لەو سووکایەتییە بێدەنگ نەبن."

 

سەبارەت بە هەوڵەکانیشی بۆ رێگری لەو تووندوتیژییەی بەرامبەر منداڵەکەی دەکرێت، مالیک گوتی: "زیاتر لە مانگێک دەبێت لە دادگە سکاڵام لەسەر خاڵی منداڵەکەم تۆمارکردووە و داواکاریم بۆ وەرگرتنەوەی کوڕەکەم پێشکێشکردووە، بەڵام ئەو کارە زۆری پێدەچێت و رەنگە تاوەکو ئەو کات کوڕەکەم لەدەستبدەم."

 

بەپێی گێڕانەوەکانی مالیک عەباس موراد، باوکی حەسەن، ئەو گرتە ڤیدیۆییە نزیکەی دوو مانگ لەمەوبەر تۆمارکراوە و لەلایەن کەسێکی نزیکی ماڵی خەزوورییەوە بڵاوکراوەتەوە.