رووداو دیجیتاڵ
گوتەبێژی وەزارەتی پەروەردەی عێراق رایگەیاند، ساڵی خوێندنی 2024-2025 بۆ یەکەمجار بابەتی "پەروەردەی ئەخڵاقی" لە قوتابخانەکاندا دەخوێندرێت و کتێبەکە گەیشتووەتە بەشێک لە کۆگەکانی بەڕێوەبەرایەتییەکانی پەروەردە، دەشڵێت: "وانەکە تەنیا پەیوەست نییە بە رۆڵەکانی یەک ئایین یان مەزهەبێکی دیاریکراو."
کەریم سەید، گوتەبێژی وەزارەتی پەروەردەی عێراق، سێشەممە، 10-9-2024، بە رووداوی راگەیاند، کتێبی پەروەدەی ئەخڵاقی ئەم ساڵ چاپکراوە، لە ژمارەیەک پۆلەوە دەستپێدەکرێت و دواتر گشتگیر دەکرێت و سەرجەم پۆلەکان دەگرێتەوە، سەرەتا بۆ ئەم ساڵی خوێندن لە پۆلی یەکی سەرەتایی و یەکی ناوەندی دەخوێندرێت، ئەو کتێبە نوێیە لە سەرجەم قوتابخانەکانی حکومی و ناحکومیش دەخوێندرێت."
گوتەبێژی وەزارەتی پەروەردەی عێراق گوتی: "کتێبەکە گەیشتووەتە بەشێک لە کۆگەکانی کتێبی بەڕێوەبەرایەتییەکانی پەروەردە لە پارێزگاکان، ژمارەیەک بابەتی پەیوەندیدار بە رۆشنبیریی رەفتار و هێڵە گشتییەکانی چاکەکاری و دادپەروەری و چەمکەکانی مرۆڤایەتی بەشێوەیەکی گشتی تێدایە."
بەگوتەی گوتەبێژی وەزارەتی پەروەردەی عێراق: "قوتابیانی سەرجەم ئایینەکان ئەو کتێبە دەخوێنن و تایبەت نییە بە ئایین یان مەزهەبێکی دیاریکرا، چونکە لە بنەڕەتدا کتێبەکە ژمارەیەک بەهای وەکو راستگۆیی، سەرکەوتن، کارکردن، هاوئاهەنگی و هی دیکە لەخۆدەگرێت.
کتێبەکە لەلایەن بەڕێوەبەرایەتی گشتی پرۆگرامەکانی وەزارەتی پەروەردە بە هاوئاهەنگی لەگەڵ ژمارەیەک دامەزراوە و دەزگای دیکە ئامادەکراوە، لەنێویاندا راوێژکارییەتی ئاسایشی نەتەوەیی، لێژنەی باڵای بەرەنگاربوونەوەی تووندڕەوی و ژمارەیەک دامەزراوەی دیکە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ