ئامارى ناوەندێک: 26%ـی عێراقییەکان بێ خانوون

 

فازڵ غەڕاوى، سەرۆکى ناوەندەکە بە تۆڕى میدیایی رووداوى راگەیاند "74%ـی عێراقییەکان لە خانووى خۆیاندان و کورتهێنانى نیشتەجێبوون گەیشتووەتە 26%، ئەوانیش کرێچین یان لەنێو ئەو کۆمەڵگەیانەدا دەژین کە بە زێدەڕۆ دروستکراون، لەو کێشەیەشدا بەغدا لە ریزبەندیی یەکەمە لەسەر ئاستى عێراق."

 

بەگوێرەى ئامارەکە؛ 31%ـی دانیشتووانى بەغدا بێ خانوون، نەینەوا لە پلەی دووەمدایە و 28% دانیشتووانەکەی کرێچین یان لە خانووی زێدەڕۆدا دەژین، بەسرەش بە 10% لە پلەی سێیەمدا دێت.

 

فازڵ غەڕاوى گوتی "هۆکارى سەرەکیی ئەو رێژەیەى کورتهێنان لە  شوێنى نیشتەجێبوون، تەقینەوەى نائاسایی ژمارەى دانیشتووانى عێراقە لەگەڵ کۆنیی نەخشەى شارەکان و نەبوونى کۆمەڵگەى نیشتەجێبوون."

 

بەپێی ئامارى وەزارەتى پلاندانانى عێراق، کۆتایی ئەمساڵ ژمارەى دانیشتووانی عێراق بۆ سەرووی 43 ملیۆن کەس زیاد دەکات.