وەزارەتی بازرگانیی عێراق بۆ رووداو: لە مانگی رەمەزاندا چوار مادەی خۆراکیی دیکەش دەدرێتە هاووڵاتییان

 

 

محەممەد حەنوون، گوتەبێژی وەزارەتی بازرگانیی عێراق ئەمڕۆ یەکشەممە میوانی بوولتەنی کاژێر 09:00ی تۆڕی میدیایی رووداو بوو و وەڵامی پرسیارەکانی محەممەد شێخ فاتیحی دایەوە.

 

محەممەد حەنوون رایگەیاند، "چوار مادەی خۆراکی لە مانگی رەمەزاندا دەخرێنە سەر کۆی مادە خۆراکییەکانی دیکە. لە هەمان کاتدا ناوەندی بەبازاڕکردنی خۆراک لە بەغدا و پارێزگاکانی دیکە دەکرێتەوە کە تێیاندا خۆراک بە نرخی پاڵپشتیکراو دەدرێتە هاووڵاتیان. هاوکات دەزگای چاودێریکردنی بازاڕ دەست بەکارەکانی دەکات، ئەوەش بە هاوئاهەنگی وەزارەتی ناوخۆ و ئاسایشی نیشتمانیی بۆ ئەوەی لە نزیکەوە چاودێری بازاڕ بکرێت و رێگری لە بەرزبوونەوەی نرخی خۆراک بکرێت."

 

بەشە خۆراکی مانگانە لە حەوت مادە پێکدێت کە بریتیین لە ئارد، برنج، شەکر، رۆنی شل، دۆشاوی تەماتە و پاقلەمەنییەکان؛ گوتەبێژی وەزارەتی بازرگانیی عێراق دەڵێت، "سێ مادەی دیکە زیاد دەکرێن کە بریتین لە ماکەرۆنی، نیشاستە و ئاردی سفر. هەروەها بۆ ئەو خێزانانەی دەستەبەری کۆمەڵایەتی دەیانگرێتەوە، جگە لە 11 مادەی خۆراک، چا و شیر و بڕێکی زیاتریش لە رۆنی شل و شەکریان پێدەدرێت. هاووڵاتی تەنیا 500 دینار بۆ هەر ئەندامێکی خێزان بە بریکاری خۆراک دەدات."

 

هاووڵاتییانی هەرێمی کوردستانیش، هاوشێوەی پارێزگاکانی دیکە حەوت مادەی خۆراکی وەردەگرن؛ لەپاڵ ئەوەشدا، بە گوتەی محەممەد حەنوون، "چوار مادەی خۆراکی دیکەشیان لە رەمەزاندا بۆ زیاد دەکرێت. کۆگاکان لە هەولێر، سلێمانی و دهۆک پڕن لە مادە سەرەکییەکانی بەشە خۆراکی مانگانە. سایلۆکانیشیان ئەو بڕە ئاردەیان تێدایە بۆ دابەشکردن بەسەر هاووڵاتییان پێویستە."

 

گوتەبێژەکەی وەزارەتی بازرگانیی عێراق ئەوەی خستەڕوو، "هاوئاهەنگییەکی زۆر باش لە نێوان حکومەتی هەرێم[ـی کوردستان] و حکومەتی ناوەند هەیە، لە رێگەی هەردوو وەزارەتیی بازرگانییەوە بۆ زاڵبوون بەسەر زۆربەی بەربەست و ئاستەنگە جیاوازەکان کە دەکرێت سەرهەڵبدەن. بۆیە چالاکییەکانمان لە هەرێم [ـی کوردستان] لەوپەڕی باشیدان، ئەوەش لە رێگەی ئاسانکارییەکانی وەزارەتی بازرگانیی حکومەتی هەرێمی کوردستانەوە."

 

سەبارەت بە هەنگاوەکانیان بۆ کۆنترۆڵکردنی دۆخی بازاڕ لە مانگی رەمەزاندا، گوتەبێژی وەزارەتی بازرگانیی عێراق باسی لەوە کرد، "دەستمانکردووە بە دامەزراندنی ناوەندی بەبازاڕکردن، دوای ئەوەی نرخی هێلکە و مریشک و گۆشت بەرزبووەوە. ئامانج لەو هەنگاوە، گەیاندنی مادە خۆراکییەکانە بۆ خێزانە هەژارەکان بە نرخی پاڵپشتیکراو. پلانی داهاتوومان ئەوەیە ئەم ناوەندانە گەشەی زیاتریان پێ بدرێت و بکرێنە مۆڵی گەورە کە هەموو مادە خۆراکییەکانیان تێدا بێت. سەرەتا لە پارێزگاکانی نێوەڕاست و باشوورەوە دەستپێدەکەین و بەردەوامین لە دامەزراندنی سەکۆی بازاڕکردن لە سەرجەم پارێزگاکان و هیوادارین هاوئاهەنگی لەگەڵ وەزارەتی بازرگانیی هەرێمی کوردستان بکرێت بۆ فەراهەمکردنی سەکۆی بازاڕکردن بۆ مادە خۆراکییەکان لە ناوچەکانی هەرێمـی کوردستانیش."

 

محەممەد حەنوون ژمارەی ئەو کەسانەی ئاشکرا کرد کە بەرپرسیارن لە دابینکردنی بەشە خۆراکی مانگانە بۆیان و ئەوەی خستەڕوو، 41 ملیۆن و 500 هەزار هاووڵاتی لە چوارچێوەی بەشە خۆراکی مانگانە لە سەرجەم پارێزگاکانی وڵات بەشە خۆراکیان پێدەدرێت، "هەروەها حەوت ملیۆن ئەندامی ئەو خێزانانەمان هەن کە دەستەبەری کۆمەڵایەتی دەیانگرێتەوە کە 11 مادەی خۆراکی وەردەگرن لەگەڵ ئەو چوار مادە خۆراکییەی بۆ مانگی رەمەزان زیاد دەکرێت. وەزارەتی بازرگانی بەشە خۆراکی زیاتر لە 49 ملیۆن هاووڵاتی بەگشتی لە چوارچێوەی بەشە خۆراکی مانگانە دابین دەکات."

 

سەبارەت بە کواڵیتی مادە خۆراکییەکان ئەوەی گوت، "هەمیشە بانگەواز بۆ رۆژنامەڤان و میدیاکار، هاووڵاتییان، پەرلەمانتاران دەکەین کە هەرکەسێک بیەوێت لە نزیکەوە چاودێری دۆخی مادە خۆراکییەکان بکات، دەرگای کۆگاکانمان کراوەیە. مادە خۆراکییەکانمان لە دامەزراوە خۆراکییە بەناوبانگەکانی جیهان دەستدەکەون و لەلایەن هەردوو حکومەتی هەرێم [ـی کوردستان] و حکومەتی ناوەندییەوە پشکنینی کواڵیتییان بە هاوبەشی بۆ دەکرێت؛ هەروەها هەرێم [ـی کوردستان] بە ئامرازی دیکەش پشکنینیان بۆ دەکات، دوای پشکنینی بەغدا . ئامێرەکانمان لە تاقیگە حکومییەکاندا زۆر پێشکەوتوون و کارمەندانمان 35-40 ساڵ ئەزموونیان لە پشکنینی خۆراک هەیە."

 

گوتەبێژەکەی وەزارەتی بازرگانیی عێراق داوا دەکات، "هەر مادەیەکی خۆراکی گومان لە خراپی کواڵیتی و ماوەی بەسەرچوونی بکرێت، دەتوانرێت بگەڕێندرێتەوە و کۆگانمان لەماوەی 24 کاژێردا دەیگۆڕن. سەرجەم ئەو مادە خۆراکییانەی لە بەغدا پشکنینیان بۆ کراوە، دووبارە لە هەرێم [ـی کوردستان] پشکنینیان بۆ دەکرێت. سەرجەم پشکنینەکان باشی کواڵیتی مادە خۆراکییەکان دەسەلمێنن."

 

سەبارەت بە هاوردەکردنی گۆشت و مریشک لە مانگی رەمەزاندا محەممەد حەنوون بە رووداوی گوت، "وەزارەتی بازرگانی رەزامەندی لەسەر هاوردەکردنی گۆشت و مریشک داوە. ناچاربووین بەخێرایی بڕێکی زۆر گۆشت و مریشک هاوردە بکەین. گۆشت و مریشک بەخێراترین شێوە بەسەر پارێزگاکان دابەش دەکرێت. لە رۆژی یەکەمی رەمەزانەوە نرخ ئاسایی دەبێتەوە، بەهۆی ئەو رێکارانەی حکومەت گرتوونیەتەبەر."