هاووڵاتییەکی بیابانەکە: هێشتا گۆڕی بەکۆمەڵ ماوە و هەڵنەدراوەتەوە، لە ناوچەی سایبیە و لەسەرووی نوگرە سەلمانیش
رووداو - سەماوە
بیابانەکانی سەماوە، ئەو شوێنەی بووەتە نیشتمانی گۆڕەبەکۆمەڵەکانی هەزاران هاونیشتمانیی کورد کە بێ ئەوەی بزانن "بِأَيِّ ذَنبٍ قُتِلَتْ" زیندەبەچاڵ کران و دوای 35 ساڵ، هێشتاش کەسوکاریان بە ئاواتن لانیکەم رووفاتیان بگەڕێندرێتەوە کوردستان.
ساڵی 2019 دوایین گۆڕی بەکۆمەڵی کوردان لە ناوچەی شێخییە هەڵدراوەتەوە کە لە 52 کیلۆمەتری باکووری نوگرە سەلمان هەڵکەوتووە و دەکەوێتە باشووری سەماوە.
بیاباننشینێکی شێخییە، هۆزەکەی تاقانەکەی ئەنفالیان لەخۆگرتووە و پێیوایە بست بە بستی ئەم خاکە، گۆڕستانی کوردانی ئەنفالکراوە.
فەهد ناسر زیادی، بیاباننشینە و قسە بۆ رووداو دەکات، دەڵێ گۆڕەبەکۆمەڵەکان بۆ ساڵانی هەشتاکان دەگەڕێنەوە، لەسەردەمی سەدام کەس نەیدەتوانی بچێتە ئەو شوێنانە، بەڵام لەدوای سەردەمی سەدام خەڵک زانیان گۆڕستانە. ئەوکاتە، ئێرە وەکو ناوچەیەکی قەدەخەکراو بوو، هەندێک کەس باخیان هەبوو و نەیاندەتوانی بچنە ئەوێ، هیچیشیان لێ نەدەچاند، زەوییەکە زۆر بوو و نزیکەی 10 دۆنم دەبوو.''
کاتێک لە فەهد دەپرسی "پێتوایە هێشتا گۆڕی بەکۆمەڵ ماوە و هەڵنەدراوەتەوە؟" وەڵامەکەی بەمشێوەیەیە "بەڵێ، هەیە. لە ناوچەی سایبیە گۆڕی بەکۆمەڵ هەیە و لەسەرووی نوگرە سەلمانیش هەیە، بەڵام هێشتا نەدۆزراونەتەوە، بەڵام هەیە.''
هەرچەندە لەگەڵ رووخانی رژێمی بەعسدا دەست بە دۆزینەوە و هەڵدانەوەی گۆڕە بەکۆمەڵەکان کرا، بەڵام هەرزوو حکومەتە یەک لەدوای یەکەکانی عێراقی نوێ، بە پاساوی جیاواز پرۆسەی دۆزینەوە و هەڵدانەوەی گۆڕە بەکۆمەڵەکانیان پەکخست.
کەسی یەکەمی فەرمانگەی گۆڕەبەکۆمەڵەکانی عێراق لە وەڵامی رووداودا دەڵێت "ساڵی 2024، کاری لەسەر دەکەین."
زەرغام کامیل، بەڕێوەبەری فەرمانگەی گۆڕەبەکۆمەڵەکان لە دەزگای شەهیدانی عێراق گوتی "کاتێک ئاگاداردەکرێینەوە بە بوونی گۆڕی بەکۆمەڵ، جا لەڕێگەی لایەنی حکومیەوە بێت، شایەتحاڵ، رزگار بوو یان لەڕێگەی هاووڵاتییان، راستەخۆ تیمێکی هونەری پێکدەهێنین، پلانی 2024ـمان بەشێکی بۆ هەڵدانەوەی گۆرڕەکانی سەردەمی رژێمە.''
سستی هەڵدانەوەی گۆڕە بەکۆمەڵەکان بەشێوەیەکە، 20 ساڵ دوای رووخانی سەددام، لەکۆی زیاتر لە 182 هەزار ئەنفالکراو، تەنیا رووفاتی 3 هەزار و 500 کەسیان گەڕێندراوەتەوە کوردستان و زیاتر لە 4 ساڵە، ئێسک و پرووسکی 171 ژن و منداڵی ئەنفالکراوی گەرمیان لە پزیشكی دادی بەغدا چاوەڕێی پشکنینە.
بیابانەکانی باشووری عێراق بەتایبەت سەماوە، کە ساڵانی هەشتاکانی سەدەی رابردوو ئاهـ و ناڵەی ژن و منداڵی کورد بەرۆکی گرتبوو، تادێت وشکتر و بێدەنگتر دەبێت، ئێستا تاکە دەنگ کەسوکاری ئەنفالکراوانن کە چاوەڕوانن ئەو دەوڵەتەی خەون و ژیانی لێرە لێ ناشتن، لانیکەم رووفاتیان بۆ بگەڕێنێتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ