بەرهەم ساڵح و مایک پێنس دوایین پێشهاتەکانی عێراقیان تاوتوێکرد

 

 

بەپێی راگەیێندراوێکی سەرۆکایەتی کۆماری عێراق، د. بەرهەم ساڵح سەرۆككۆماری عێراق ئەمڕۆ دووشەممە پەیوەندییەكی تەلەفۆنی لە مایك پێنس، جێگری سەرۆكی ئەمریكاوە پێگەیشت. مایك پێنس پشتیوانی خۆی بۆ ئارامی عێراق و ئەو داواكارییانەی كە عێراقییەكان هەیانە بە ئاراستەی چاكسازی، چەسپاندنی ئاشتی و رەتكردنەوەی تووندوتیژی دووپاتکردەوە، ھەروەھا ئاماژەی بە گرنگی رێزگرتن و پارێزگاریكردن لە ویستی عێراقییەكان و بژاردەكانیان کرد بەشێوەیەک دووربێت لە هەر دەستێوەردانێكی دەرەكی.

 

لەو پەیوەندییە تەلەفۆنییەدا سەرۆككۆماری عێراق سووربوونی خۆی دووپاتكردەوە لەسەر چارەسەركردنی دۆخی ئێستا كە وەڵامدانەوەیەك بێت بۆ بڕیاری نیشتمانی عێراقی بەدوور لە هەر دەستوەردانێكی دەرەكی بە شێوەیەكی ئاشتییانە كە تێیدا پارێزگاری لە ئاسایش و خوێنی گەلی عێراق بكات و یارمەتیدەر بێت بۆ بەرزڕاگرتنی دەسەڵاتی یاسا و دەوڵەت و پارێزگاریش لە مافی رادەربڕین و خۆپیشاندانی ئاشتییانە بكات، هەروەك رێگریش بكات لە هەر هەوڵێك بۆ دەستوەردان لە كاروباری ناوخۆی وڵات و شێواندنی باری ئەمنییەكەی.

 

سەرۆككۆمار جەختی لەسەر پێویستی رەتكردنەوەی تووندوتیژی و پارێزگاریكردن لە جوڵەی ئاشتییانەی جەماوەری و رەچاوكردنی مافی خەڵکی عێراق لە دەربرینی بیروڕاو داواكارییەكانیان كە لەگەڵ دەوڵەتێكی دیموكراتی دێتەوە. هەروەها دووپاتیشیكردەوە لەسەر پشتیوانیكردنی دەزگا ئەمنی و سەربازییەكان بۆئەوەی ئەركی نیشتمانی خۆیان راپەڕێنن لە پارێزگاریكردنی گیانی هاووڵاتیان و دامەزراوەكان و رێگریكردن لە هەر سەرپێچی و لادانێك كە دەكرێتە سەر هاووڵاتیان و ئاسایشی گشتی.

 

لە بەشێکی دیکەی پەیوەندییەکەیاندا، بەرهەم ساڵح و مایک پێنس یادی ئازادكردنی شاری موسڵ و ئەو قوربانییانەی كە گەلی عێراق لەپێناو بەرەنگاربوونەوەی تیرۆر داویانە كردەوە و بە بایەخەوە باسیان لە رۆڵی ویلایەتە یەكگرتووەكانی ئەمریكا و هاوپەیمانی نێودەوڵەتی و ئەو پشتیوانییەی لە عێراق كراوە لە جەنگی دژ بە تیرۆر، کردەوە. هاوکات جەختیان لە گرنگی بنیادنانەوەی شارە وێران بووەكان و گەڕاندنەوەی ئاوارەكان و زامنكردنی پێكەوەژیانی پێكهاتە ئایینی و نەتەوەییەكان و پارێزگاریكردن لە یەكڕیزیان بۆ بەرەنگاربوونەوەی تووندوتیژی.