لە بەغدا خێزانێک کوڕە ئالوودەبووەکەیان رادەستی بەڕێوەبەرایەتیی بنبڕکردنی مادەی هۆشبەر دەکەن

 

خوشکی ئالوودەبووەکە باسی دۆخی براکەی دەکات و دەڵێت، "ئێمە خێزانێکى ناسراوین، هاتووین بۆ ئێرە بۆ ئەوەى کێشەکەمان بخەینەڕوو بۆ ئەوەى چارەسەرێکمان بۆ بدۆزنەوە، براکەم ئالوودەى مادەى هۆشبەرە و دەمانەوێت لەسەر ئەم رێگەیە لایبدەین، بەڵام دەمانەوێت سزا نەدرێت و بەند نەکرێت."

 

بەپێى یاسای بنبڕکردنى مادەى هۆشبەر، تاوانى بەکارهێنانى ئەو مادەیە دەگاتە سێ ساڵ بەندکردن، بەڵام ئەگەر بەکارهێنەرەکە خۆى رادەست بکات، سزا نادرێت، بەڵکو چارەسەر وەردەگرێت. 

 

لە عێراق هەشت ناوەندى شیاندنەوە و چارەسەرى ئالوودەبووانى مادەى هۆشبەر لەعێراق هەن، کە سێ لەو ناوەندانە لە بەغدان، تاوەکو کۆتایی 2023 دوو ناوەندى دیکە لە نەجەف و سەڵاحەدین دەکرێنەوە.

 

بەگوێرەى دوایین ئامارەى وەزارەتى تەندروستى عێراق زیاتر لە 4500 ئالوودەبووى مادەى هۆشبەر لەو ناوەندانە چارەسەرکراون 

 

لیوا ئەحمەد زرگانی، بەڕێوەبەرى بنبڕکردنى مادە هۆشبەرەکان گوتی، "ئێمە دەتوانین وەک پێویست چارەسەرى بکەین، هەوڵدەدەین بیکەینەوە بە مرۆڤێکى چاکەخواز و بیگەڕێنینەوە بۆ رێگە دروستەکە، لە کۆتاییدا ئاڵودەبووى مادەى هۆشبەر قوربانییە، دەبێت دامەزراوەکانى دەوڵەت لەو تەنگژەیە دەریبهێنێت."

 

بەگوێرەى ئامارەکانى وەزارەتى ناوخۆ لە 10 مانگى یەکەمى ئەم ساڵدا 11 هەزار کەس لەسەر مادەى هۆشبەر دەستگیرکراون، 4500 یان بازرگان و فرۆشیارى ئەو مادانە بوون و 6500 کەسیش بەکارهێنەر بوونە. هەر لەو ماوەیەدا 13 بازرگانى مادەى هۆشبەر کوژراون و دەستیش بەسەر سێ تۆن مادەی هۆشبەردا گیراوە.