وەزیرى بەرگریى عێراق: زانیارى هەیە خەڵک لە سەماوە و ناسریە پەیوەندییان بە پەکەکە کردووە

 

 

سابت عەباسی، وەزیرى بەرگریى عێراق رایگەیاند: گفتوگۆ لەگەڵ تورکیا کراوە و وەک حکومەتى عێراقى لە هەوڵى ئەوەدان لەگەڵ تورکیا رێکبکەون وەک چۆن لەگەڵ ئێران رێککەوتوون بۆ دوورخستنەوەى گرووپە دژبەرەکان لە سنوور و چەکداماڵینیان. گوتیشى: "تورکیا داوای کردووە ئەو دۆخە بەو شێوەیە چارەسەربکەین کە لەگەڵ ئێران چارەسەرمان کردووە".

 

رۆژی 19ی ئاداری 2023 عەلی شەمخانی، سکرتێری ئەوکاتی ئەنجوومەنی باڵای ئاسایشی نیشتمانیی ئێران و قاسم ئەعرەجی، راوێژکاری ئاسایشی نیشتمانیی عێراق لە بەغدا رێککەوتنی ئەمنیی نێوان هەردوو وڵاتیان واژۆ کرد و یەکێک لە خاڵەکانی تایبەت بوو بە دوورخستنەوەی هێزەکانی رۆژهەڵاتی کوردستان لە سنووری نێوان هەرێمی کوردستان و رۆژهەڵاتی کوردستان.

 

سابت عەباسی گوتی: بەگوێرەى بڕیارى دادگە بارەگاکانى پەکەکە داخراون و فەرمانگەى پارتە سیاسییەکانى کۆمیسیۆن چەند پارتێکى یاساغ کردووە".

 

شاندی باڵای ئەمنی عێراق و تورکیا 15ـی مانگی رابردوو لە ئەنقەرە لەسەر یاداشتێکى لێکتێگەیشتن، رێککەوتن کە لەلایەن سابت عەباسی، وەزیری بەرگریی عێراق و یاشار گولەر، وەزیری بەرگریی تورکیا واژۆکرا، یاداشتنامەکە لە بارەی هاوئاهەنگیی سەربازیی و ئەمنی و ''بەرەنگاربوونەوەی تیرۆر'' بووە لە نێوان هەردوولا.

 

وەزیرى بەرگریى عێراق لە چاوپێکەوتنێکی تەلەڤزیۆنیدا گوتى: "حکومەتى عێراق  نیگەرانە بەرامبەر جوڵەى پەکەکە و هەوڵیان بۆ پەلکێشکردنى کەسانێک لە پارێزگاکانى دیکە بۆ نێو ریزەکانى، زانیاریمان هەیە لە ناسڕیە و سەماوە کەسانێک پەیوەندییان بە پەکەکەوە کردووە".

 

بەپێی لێکتێگەیشتنەکە، عێراق و تورکیا ناوەندی هاوئاهەنگیی ئەمنی هاوبەش لە بەغدا دادەمەزرێنن، کە سەر بە فەرماندەیی ئۆپەراسیۆنە هاوبەشەکان دەبێت و بەهاوبەشی بەڕێوەدەبردرێت. 

 

سابت عەباسی گوتی: "گوشارمان لە تورکیا کردووە ئەو ناوچانە رادەستی هێزى پێشمەرگە یان هێزەکانى سەر بە حکومەتى فیدڕاڵى بکاتەوە، کە لەشکرکێشیان بۆ کردووە. رەشنووسى رێککەوتێک هەیە و تورکیا ئامادەیی دەربڕیوە".