نۆ سەرۆک هۆز لە ئاسانسوارێکی دیوانی پارێزگای سەڵاحەدین رزگارکران

 

 

گوتەبێژی پارێزگای سەڵاحەدین رایگەیاند، "ئاسانسوارەکە بۆ 4 کەس تەرخانکراوە، کەچی 9 کەس چووبوونە نێوی و ئەوەش کێشەی بۆ ئاسانسوارەکە دروستکردبوو".

 

فەخری ساڵح، گوتەبێژی پارێزگای سەڵاحەدین، ئەمڕۆ دووشەممە، 9ـی ئەیلوولی 2024، بەتۆڕی میدیایی رووداوی راگەیاند، "ئەمڕۆ بەڕێز بەدر ئەلفەحل، پارێزگاری سەڵاحەدین، پێشوازی لە ژمارەیەک سەرۆک هۆزی ناحیەی یەسربی سەر بە پارێزگاکە کرد، بەڵام لەو کاتەی بەشێک لە سەرۆک هۆزەکان چوونە نێو ئاسانسوار، ئاسانسوارەکە لەکارکەوت و بۆ ماوەی یەک کاژێر تێیدا گیریان خوارد".

 

باڵەخانەی پارێزگای سەڵاحەدین تەنیا سێ نهۆمە، بە گوتەی گوتەبێژی پارێزگای سەڵاحەدین ئاسانسوارەکە لە نێوان نهۆمی زەوینی و نهۆمی یەکەمدا لەکارکەوتبوو.

 

فەخری ساڵح لەبارەی هۆکاری لەکارکەوتنی ئاسانسوارەکە گوتی، "لە بنەڕەتدا بەرزکەرەوەکە بۆ چوار کەس کراوە، بەڵام نۆ سەرۆک هۆز بە جارێک چووبوونە نێو ئاسانسوارەکە. ئەوەش وایکردووە لەکاربکەوێت".