ئەوانەی مۆبایل و پارەیان لە زیارەتکارانی چلەی ئیمام حوسێن دەدزی، دەستگیرکران

 

 

لیوای چواری حەشدی شەعبی لە بەسرە لە راگەیێندراوێکدا دەڵێت، "3 تۆمەتبار بە هاوئاهەنگی هێزەکانی تایبەت بە ئۆپەراسیۆنەکانی بەسرە دەستگیرکران کە پارە و مۆبایلی زیارەتکارانی چلەی ئیمام حوسێنیان لە کەربەلا دزیبوو".

 

ئەو کەسانە تەمەنیان لەنێوان 20 و 25 ساڵیدایە و رادەستی لایەنە پەیوەندیدارەکان کراون بۆ ئەوەی رێکاری یاساییان بەرامبەر بگیرێتەبەر.

 

عێراق بە وڵاتی مەزارە پیرۆزەکانی شیعەکان دەناسرێت و گۆڕی ئیمامی عەلی، ئیمامی حوسێن و ئیمامی عەباسی لێیە و ساڵانە ملیۆنان شیعە لە زیاتر لە 30 وڵاتەوە سەردانی مەزارگەی ئیمامەکانی شیعە لە عێراق دەکەن.

 

چلەی ئیمامی حوسێن لای شیعەکان بایەخی زۆری پێدەدرێت و ئەم ساڵ دەکەوێتە 25ـی ئاب و لە ئێستاوە بەشێک لە شیعەکان بۆ رۆیشتن بەرەو کەربەلا بەپێ لە بەسرە و پارێزگاکانی دیکەی باشوورەوە دەستیان بە گەشتەکەیان کردووە.