سزای حەوت ساڵ زیندانیکردن بۆ پارێزگاری پێشووی نەینەوا دەردەچێت

 

دەستەی دەستپاکیی عێراق رایگەیاند، دادگەی تاوانەکان، پارێزگاری پێشووی نەینەوای تاوانبارکردووە بە خەرجکردنی پارە لە بنکەکانی حەشدی نیشتمانی ( زیلکان، دووبەردان، مەخموور و رەبیعە) بەپێچەوانەی رێنوێنییەکان لە ساڵی 2015دا، ئەمەش بەفیڕۆدانی سامانی گشتییە.

 

ئەسیڵ نوجێفی، پارێزگاری پێشووی نەینەوا، هەواڵەکەی بۆ رووداو پشتڕاستکردەوە و ئەمڕۆ شەممە 9.4.2022 بە رووداوی راگەیاند، بەڵێ راستە، بڕیاری زیندانیکردنم بۆ دەرچووە، بەڵام ئەمە بۆ من وەکو حوکمەکانی پێشووە و دەتوانم لە رێگەی یاساوە چارەسەری بکەم.

 

نوجێفی گوتی، "بەهۆی ئەوەی پێشتر بە رێنوێنیی ئەمینداری گشتیی ئەنجوومەنی وەزیران بۆ رووبەڕووبوونەوەی داعش، کە سەربەستی کردبووین هەرچییەکمان لەدەستبێت بۆ رووبەڕووبوونەوەی داعش بیکەین، هەستیان بە دروستکردنی چەند بنکەیەکی سەربازی لە زیلکان، باشیک و تیلسقۆف و چەند شوێنێکی دیکە بۆ راهێنانی خەڵک بۆ رووبەڕووبوونەوەی داعش، بەڵام هەندێ کەس بە مەرامی سیاسی دەیانەوێ ئەم بابەتە بە لاڕێدا ببەن بەوەی کە سەرپێچی یاسایە". 

 

پارێزگاری پێشووی نەینەوا ئاماژەی بەوەشکرد، سەرەڕای ئەوەی من بە شێوەی ئامادەنەبوو حوکمدراوم، ئێستاش سوورم لەسەر ئەوەی کە ئەم بنکە سەربازییانە بۆ رووبەڕووبوونەوەی داعش دامەزراون.