09-01-2022
20:28
محەممەد حەلبووسی وەکو سەرۆکی پەرلەمانی عێراق هەڵبژێردرایەوە
محەممەد حەلبووسی، سەرۆکی پەرلەمانی عێراق
لە پەرلەمانی عێراق پرۆسەی دەنگدان بۆ هەڵبژاردنی سەرۆکی پێنجەمین خولی پەرلەمانی عێراق بەڕێوەچوو، تێیدا محەممەد حەلبووسی توانی زۆرینەی دەنگەکان بەدەستبهێنێت و ببێتەوە سەرۆکی پەرلەمان.
لە پرۆسەی دەنگدانەکەدا بۆ هەڵبژاردنی سەرۆکی پەرلەمانی عێراق 228 پەرلەمانتار دەنگیان داوە، لەو ژمارەیەش 200 پەرلەمانتار دەنگیان بۆ محەممەد حەلبووسی و 14 پەرلەمانتار دەنگیان بۆ مەحموود مەشهەدانی داوە و 14 دەنگیش پووچەڵ بوون.
تاکە رکابەری حەلبووسی بۆ پۆستی سەرۆکی پەرلەمان مەحموود مەشهەدانی، بەتەمەنترین پەرلەمانتاری پەرلەمانی عێراق بوو. محەممەد حەلبووسی خولی چوارەمی پەرلەمانیش سەرۆکی پەرلەمان بووە، بەوەش دوو خولی لەسەریەکی پەرلەمانە لەو پۆستەدایە.
بەڕێوەچوونی پرۆسەی دەنگدان بۆ هەڵبژاردنی سەرۆکی پەرلەمان دوای تێکچوونی دۆخی تەندروستیی مەحموود مەشهەدانی بۆ ماوەیەک دواکەوت، بەڵام دواتر خالید دەڕاجی سەرۆکایەتیی دانیشتنی ئەنجوومەنی نوێنەرانی عێراقی گرتەدەست، کە لەدوای مەحموود مەشهەدانی بەتەمەنترین پەرلەمانتارە.
دوای نزیکەی سێ مانگ لە بەڕێوەچوونی هەڵبژاردنی پەرلەمانی عێراق، رۆژی یەکشەممە 09-01-2022 دەستەی نوێی خولی پێنجەمی پەرلەمانی عێراق دەستبەکاربوون و سوێندی یاساییان خوارد.
19:27
چوارچێوەی هاوئاهەنگی داوا دەکات وەکو گەورەترین فراکسیۆن بناسێندرێت
پەرلەمانی عێراق
لە یەکەم دانیشتنی پەرلەمانی عێراق، گوتەبێژی چوارچێوەی هاوئاهەنگی نامەی گەورەترین فراکسیۆنی رادەستی مەحموود مەشهەدانی کرد. مستەفا گۆران، پەیامنێری تۆڕی میدیایی رووداو لە بەغدا رایگەیاند، ئەحمەد ئەسەدی، گوتەبێژی چوارچێوەی هاوئاهەنگی نامەی رادەستی مەحموود مەشهەدانی، سەرۆکی بەتەمەنی پەرلەمان کردووە و تێیدا ناوی 88 پەرلەمانتاری تێدایە و داوایکردووە چوارچێوەی هاوئاهەنگی وەکو گەورەترین فراکسیۆنی نێو پەرلەمان بناسرێت.
چوارچێوەی هاوئاهەنگی ژمارەیەکی زۆری لایەنە شیعەکانی تێدایە و دیارترینیان بریتین لە هاوپەیمانیی دەوڵەتی یاسا بە سەرۆکایەتیی نووری مالیکی و هاوپەیمانیی فەتح بە سەرۆکایەتیی هادی عامری.
هێزی رکابەری ئەوان لەنێو شیعەکاندا بریتییە لە فراکسیۆنی سەدری کە خاوەنی 73 کورسیی پەرلەمانە.
19:07
لە دانیشتنی پەرلەمانی عێراق دۆخی تەندروستیی مەحموود مەشهەدانی تێکچوو
ساتی گواستنەوەی مەشهەدانی بۆ نەخۆشخانە
لە دانیشتنی یەکەمی خولی پێنجەمی پەرلەمانی عێراق دۆخی تەندروستیی مەحموود مەشهەدانی، سەرۆکی تەمەن تێکچوو و رەوانەی نەخۆشخانە کرا.
بەهۆی کێشەی نێوان فراکسیۆنی چوارچێوەی هاوئاهەنگی و فراکسیۆنی سەدر دانیشتنی پەرلەمان راگیراوە، کێشەکەش لەسەر راگەیاندنی فراکسیۆنی گەورە بوو لەلایەن چوارچێوەی هاوئاهەنگییەوە کە 88 پەرلەمانتارن، ئەوەش لە کاتێکدایە کە ژمارەی پەرلەمانتارانی رەوتی سەدر 73 پەرلەمانتارە.
لەکاتی بەڕێوەچوونی دانیشتنی پەرلەمانی عێراق دۆخی تەندروستیی مەشهەدانی تێکچوو، ئەگەر ناوبراو نەگەڕایەوە بۆ بەڕێوەبردنی دانیشتنەکە، لە ئەگەری دەستپێکردنەوەی دانیشتنەکە خالید دەڕاجی سەرۆکایەتیی دەکات، چونکە دوای مەشهەدانی ئەو بەتەمەنترین پەرلەمانتارە.
16:42
دەرگای خۆ پاڵاوتن بۆ دەستەی سەرۆکایەتیی پەرلەمان کرایەوە
پەرلەمانتارانی خولی پێنجەمی پەرلەمانی عێراق سوێندی یاساییان خوارد
یەکەمین کۆبوونەوەی خولی پێنجەمی پەرلەمانی عێراق بەڕێوەدەچێت و پەرلەمانتارانی خولی پێنجەمی پەرلەمانی عێراق سوێندی یاساییان خوارد.
رۆژی یەکشەممە 9-1-2022 یەکەمین کۆبوونەوەی خولی پێنجەمی پەرلەمانی عێراق دەستیپێکرد و پەرلەمانتارانی خولی پێنجەمی پەرلەمانی عێراق سوێندی یاساییان خوارد و مەحموود مەشهەدانی، وەکو بەتەمەنترین پەرلەمانتار سەرۆکایەتیی یەکەمین کۆبوونەوەی پەرلەمان دەکات.
پەیامنێری رووداو لە بەغدا رایگەیاند، 11 کەس خۆیان بۆ دەستەی سەرۆکایەتیی پەرلەمان بەربژێر کردووە و محەممەد حەلبووسی بەربژێری سوننەکانە بۆ پۆستی سەرۆکی پەرلەمان و ئاماژەی بەوەشکرد، فراکسیۆنی پارتی دەنگ بە حاکم زاملی دەدات بۆ جێگری یەکەمی سەرۆکی پەرلەمان.
لە دانیشتنەکەی ئەمڕۆدا لە کۆی 329 پەرلەمانتار، 325 پەرلەمانتار ئامادە بوون و ئێستاش سەرۆکی بەتەمەنی پەرلەمان، دەرگای خۆپاڵاوتنی بۆ دەستەی سەرۆکایەتی کردووەتەوە.
14:26
دوایین بڕیاری نێو کۆبوونەوەی فراکسیۆنی پارتی
دوایین بڕیاری نێو کۆبوونەوەی فراکسیۆنی پارتی
کۆبوونەوەی فراکسیۆنی پارتی دیموکراتی کوردستان لە بەغدا کۆتاییهات و نەهرۆ مەحموود، پەرلەمانتاری پارتی بە رووداوی گوت، دوایین بڕیار ئەوەیە پارتی دەنگ بە محەممەد حەلبووسی دەدات بۆ بوونە سەرۆکی پەرلەمان، حاکم زاملی بۆ جێگری یەکەم و شاخەوان عەبدوڵڵاش بۆ جێگری دووەمی سەرۆکی پەرلەمان.
حاکم زاملی بەربژێری فراکسیۆنی سەدرە بۆ جێگری یەکەمی سەرۆکی پەرلەمانی عێراق.
هەڵکەوت عەزیز، پەیامنێری رووداو لە بەغدا رایگەیاند، چوارچێوەی هاوئاهەنگی داوا لە پەرلەمانتاران دەکەن کە دەنگ بە بەربژێرەکەی ئەوان بدەن بۆ جێگری یەکەمی سەرۆکی پەرلەمان کە ئەویش ئەحمەد ئەسەدییە کە هەم سەرکردەیە لەنێو هاوئاهەنگییەکە و هەم پەرلەمانتارە. هەرچەندە چوارچێوەی هاوئاهەنگی بەفەرمی ئەوەی رەتکردووەتەوە کە ئەحمەد ئەسەدی بەربژێریان بێت، بەڵام پەیامنێری رووداو گوتی، "لە پەرلەمانی عێراق گفتوگۆی ژێربەژێر هەیە و چوارچێوەی هاوئاهەنگی لەبەرئەوەی هیچ لێکتێگەیشتن و رێککەوتنێکیان لەگەڵ سەدر نییە، سەردانی پەرلەمانتاران و فراکسیۆنەکان دەکەن تاوەکو دەنگ بە ئەحمەد ئەسەدی بدەن."
نەهرۆ مەحموود لەبارەی بڕیارەکانی پارتی گوتی، دوای ئەوە بووە کە فراکسیۆنەکانی عەزم، تەقەدووم و سەدر سەردانیان کردوون و لەگەڵیاندا کۆبوونەتەوە. کورسییەکانی پارتی، سەدر و عەزم و تەقەدووم دەگەنە 167 کورسی کە 50 کۆ یەکی ئەندامانی پەرلەمان پێکدەهێنن. ئەوەش بۆ ئەوەیە بە گوتەی نەهرۆ مەحموود "چاوەڕوانی هیچ لایەنێک نەکەن" و زۆرینەی پەرلەمانی تەواو بکەن.
پەرلەمانتارەکەی پارتی گوتی، لەبەرامبەر دەنگدان بە حاکم زاملی، لایەنە شیعەکان دەنگ بە شاخەوان عەبدوڵڵا دەدەن.
13:51
ئەندامێکی هاوپەیمانیی دەوڵەتی یاسا: بەربژێرمان بۆ جێگری یەکەمی سەرۆکی پەرلەمان دیارینەکردووە
ئەحمەد فەواز، ئەندامی هاوپەیمانیی دەوڵەتی یاسا بە تۆڕی میدیایی رووداوی راگەیاند، چاوەڕوانین دانیشتنی پەرلەمان کاژێر 15:00 بکرێت و بەرکەوتەکان یەکلایی بکرێنەوە، دەشڵێت تاوەکو ئێستا چوارچێوەی هاوئاهەنگی و سەدر رێکنەکەوتوون.
لەبارەی پۆستی جێگری سەرۆکی پەرلەمان ئەو ئەندامە گوتی، "پۆستی جێگری یەکەمی سەرۆکی پەرلەمان پشکی چوارچێوەی هاوئاهەنگییە، بەڵام هێشتا بەربژێرمان بۆ ئەو پۆستە نییە."
12:58
کۆبوونەوەی پەرلەمانی عێراق دواخرا
کۆبوونەوەی پەرلەمانی عێراق دواخرا
راگەیاندنی پەرلەمانی عێراق بڵاویکردەوە کە بەهۆی کۆبوونەوەی فراکسیۆنەکان و هەوڵەکان بۆ رێککەوتنی پێشوەختە، کۆبوونەوە تاوەکو کاژێر 15:00 ناکرێت.
ئەمە دووەم جارە کۆبوونەوەکە دوادەخرێت کە بڕیاربوو لە کاژێر 11:00ـی پێشنیوەڕۆ بەڕێوەبچێت و جاری یەکەم بۆ کاژێرێک دواخرابوو.
11:11
پارتی شاخەوان عەبدوڵڵا بۆ پۆستی جێگری سەرۆکی پەرلەمانی عێراق بەربژێر دەکات
پارتی دیموکراتی کوردستان شاخەوان عەبدوڵڵا بۆ پۆستی جێگری سەرۆکی پەرلەمان بەربژێر دەکات.
لە دانیشتنی ئەمڕۆی پەرلەمانی عێراق بڕیارە دەنگ لەسەر دەستەی سەرۆکایەتیی پەرلەمان بدرێت، تاوەکو ئێستا محەممەد حەلبوسی وەکو بەربژێری سوننەکان بۆ سەرۆکی پەرلەمان دیاریکراوە، پارتیش شاخەوان عەبدوڵڵای بۆ جێگری سەرۆکی پەرلەمان دیاریکردووە.
شاخەوان عەبدوڵڵا لە خولی سێیەمی پەرلەمانی عێراق ئەندامی پەرلەمان بووە، لە دوایین هەڵبژاردنیش لە 10-10-2021 لە بازنەی یەکی کەرکووک توانیی دەنگی یەکەم بێت و زیاتر لە 31 هەزار دەنگ بەدەستبهێنێت.
ئەو بەربژێرەی پارتی ساڵی 1979 لە کەرکووک لەدایکبووە و بڕوانامەی دکتۆرای لە بواری یاسا هەیە.
10:55
دانیشتنی پەرلەمانی عێراق کاژێرێک دوادەکەوێت
بەشێک لە بەربژێرە سەرکەوتووەکانی یەکێتی لە پەرلەمان
تاوەکو ئێستا بەشێک لە ئەندامانی پەرلەمان نەگەیشتوونەتە پەرلەمانی عێراق و بەپێی زانیارییەکانی راگەیاندنی پەرلەمانی عێراق کە بە رووداوی داون، کۆبوونەوەکە ماوەی کاژێرێک دوادەکەوێت.
ئێستا دوو بۆچوونی جیاواز لە پەرلەمان هەن، بەشێک دەڵێن تەنیا پەرلەمانتاران سوێند بخۆن و دانیشتن بەکراوەیی بمێنێتەوە، بەشێکیش دەڵێن دەبێ ئەمڕۆ سەرۆکی پەرلەمان و جێگرەکانیشی هەڵبژێردێن.
پەیامنێری رووداو لە بەغدا رایگەیاند، چوارچێوەی هاوئاهەنگی داوادەکات کۆبوونەوە دوابخرێت بۆ کاژێر 15:00، رەوتی سەدریش سوورە لەسەر ئەوەی دانیشتنەکە پێش ئەو کاتە بکرێ، واتە کاژێرێکی دیکە. تاوەکو ئێستا فراکسیۆنی یەکێتی، بزووتنەوەی ئیمتداد، نەوەی نوێ، سەدرییەکان و حیکمە چوونەتە پەرلەمان.
09:18
هیچ گەرەنتییەک نییە ئەمڕۆ سەرۆکی پەرلەمانی عێراق و جێگرەکانی هەڵبژێردرێن
هیچ گەرەنتییەک نییە ئەمڕۆ سەرۆکی پەرلەمانی عێراق و جێگرەکانی هەڵبژێردرێن
ئەمڕۆ یەکشەممە، 9-1-2022 خولی نوێی پەرلەمانی عێراق یەکەم کۆبوونەوەی خۆی دەکات و لە کارنامەی کۆبوونەوەکەدا هاتووە، بەتەمەنترین ئەندامی پەرلەمان سەرۆکایەتی کۆبوونەوەکە دەکات و دەرگای خۆبەربژێرکردن بۆ پۆستی سەرۆکی پەرلەمان و هەردوو جێگرەکەی دەکاتەوە، لە کاتێکدا بەپێی دەستوور دەبێ هەموو بەربژێرەکان بۆ ئەو پۆستانە ئەندامی ئەم خولەی پەرلەمان بن.
سوننە محەممەد حەلبووسی وەکو بەربژێری فەرمی بۆ وەرگرتنی پۆستی سەرۆکی پەرلەمان دیاریکردووە، بەڵام بەشێکیان کە لە هاوپەیمانیی عەزمن لەگەڵ ئەو بڕیارەدا نین و دەڵێن مەحموود مەشهەدانی بەربژێریانە، کورد و سوننەش هێشتا بەربژێریان بۆ جێگرەکانی سەرۆکی پەرلەمان یەکلایی نەکردووەتەوە، لەبەرئەوە هێشتا هیچ گەرەنتییەک نییە کە ئەمڕۆ سەرۆکی پەرلەمان و جێگرەکانی هەڵبژێردرێن.
بەپێی ماددەی 55ـی دەستووری عێراق، لە یەکەمین دانیشتنی پەرلەماندا، دوای ئەوەی پەرلەمانتاران سوێندی یاسایی دەخۆن، دەبێت سەرۆکی پەرلەمان کە پشکی سوننەیە و دوو جێگرەکەی کە پشکی کورد و شیعەن هەڵبژێردرێن، بەڵام لە ئەگەری رێکنەکەوتنی لایەنەکان، هاوشێوەی خولی پێشوو، ئەو پاساوە یاساییە لەبەردەستە کە دانیشتنەکە درێژەی پێبدرێت و دانیشتنی دووەم وەکو تەواوکەری دانیشتنی یەکەم هەژمار بکرێت.
09:06
حەلبووسی بووە بەربژێری سوننەکان بۆ پۆستی سەرۆکی پەرلەمان
محەممەد حەلبووسی لەکاتی بەربژێرکردنی
رووداو دیجیتاڵ
پەیامنێری رووداو لە بەغدا رایگەیاند، محەممەد حەلبووسی بە فەرمی بووە بەربژێری سوننەکان بۆ پۆستی سەرۆکی پەرلەمانی عێراق.
دیاریکردنی حەلبووسی دوای گفتوگۆ و دانوستاندنی چەند مانگی رابردووی نێو ماڵی سوننەدێت. رۆژی یەکشەممەش لە کۆبوونەوەی پەرلەمان دوای سوێندخواردنی بەربژێرە سەرکەوتووەکان وەکو پەرلەمانتار، بەپێی ماددەی 55ـی دەستووری عێراق دەبێت سەرۆکی پەرلەمان و دوو جێگرەکەی هەڵبژێردرێن. دوو جێگرەکەی سەرۆکی پەرلەمان پشکی کورد و شیعەن
بەپێی زانیارییەکانی پەیامنێری رووداو 67 بەربژێری سەرکەوتووی هەردوو هاوپەیمانێتییەکە دەنگیانداوە و محەممەد حەلبووسییان وەکو بەربژێری فەرمیی سوننە بۆ سەرۆکی پەرلەمان دیاریکرد.
لە بەرامبەردا، خەمیس خەنجەر، سەرۆکی هاوپەیمانیی عەزم دەبێتە سەرۆکی ئەو هاوپەیمانێتییەی کە عەزم و تەقەدووم پێکیانهێناوە.
کۆبوونەوەی عەزم و تەقەدووم
12 پەرلەمانتاری سوننە ئامادەنەبوون دەنگ بە حەلبووسی بدەن و لە هاوپەیمانێتییەکە چوونەدەرەوە. دوای دیاریکردنی سەرۆکی پەرلەمان، بەربژێرانی سەرۆککۆمار و سەرۆکوەزیرانی عێراق دەمێنن کە پشکی کورد و شیعەن.
یەحیا محەممەداوی، گوتەبێژی عەزم بە تۆڕی میدیایی رووداوی راگەیاند، "67 پەرلەمانتاری سوننە لە کۆبوونەوە بوون و دەنگیاندا... هەوڵیشمانداوە لەگەڵ لایەنە کوردستانی و شیعەکان رێکبکەوین."
پەیامنێری رووداو ئاماژەی بەوەشکرد کە کورد هیچ کێشەیەکی لەگەڵ هەڵبژاردنەوەی حەلبووسی وەکو سەرۆکی پەرلەمان نییە.
08:57
سەدر و چوارچێوەی هاوئاهەنگی بە جیا هەوڵدەدەن گەورەترین بلۆکی پەرلەمان پێکبهێنن
کۆبوونەوەی لایەنە شیعەکان لە ماڵی هادی عامری؛ ئەرشیڤ
هێشتا وێنەی رێککەوتنێک لەنێو ماڵی لایەنە شیعەکانەوە بۆ دروستکردنی فراکسیۆنی گەورە و پێکهێنانی حکومەت لەبەرچاوی کەس روون نییە. بەڵام سەدر و چوارچێوەی هاوئاهەنگی لە هەوڵدان گەورەترین فراکسیۆنی پەرلەمانی پێکبهێنن.
موقتەدا سەدر، کە مافی پێکهێنانی حکومەت دەداتە خۆی لەبەرئەوەی خاوەنی 73 کورسییە، بەردەوام جەخت لە پێکهێنانی حکومەتی زۆرینەی نیشتمانی دەکاتەوە، چوارچێوەی هاوئاهەنگیش داوای بەشداریی هەمووان و دوایین جاریش پێکهێنانی فراکسیۆنی گەورە لەگەڵ سەدر دەکات بۆ پێکهێنانی حکومەت، بەڵام هێشتا وەڵامێکی دیار بۆ ئەو داوایە نییە.
ئەندامێکی دەوڵەتی یاساش، کە نووری مالیکی سەرۆکایەتیی دەکات دەڵێت دواجار لەگەڵ سەدر هەر دەگەنە رێککەوتنێک و وەک ئەو دەڵێت ئەو رێککەوتنەش نزیکە.
تادێت ناکۆکییەکانی نێو ماڵی شیعە زەقتر و قووڵتر دەبنەوە. تائێستا قسەی سەرەتا و کۆتایی موقتەدا سەدری رێبەری رەوتی سەدر، هەرپێکهێنانی حکومەتی زۆرینەیە. قسەیەک کە بەدڵی لایەنەکانی نێو چوارچێوەی ھاوئاھەنگی نییە و ئەمە رەتدەکەنەوە و ئامادەکاریی تەواویانکردووە بۆ ئەوەی خۆیان حکومەتی داھاتوو پێکبهبێنن و دەڵێن پێمان خۆشە سەدریش بەشداربێت .
حەیدر لامی، ئەندامی دەوڵەتی یاسا گوتی: "دەمانەوێت ھەمووان بەشداربن ، پشت بەخوا دەگەینە رێککەوتن لەسەر خاڵە ناکۆکەکان لەگەڵ سەید موقتەدا. ئێمە نامانەوێت حکومەتێک پێکبھێنین بێ بەشداریی موقتەدا سەدر ، چونکە سەید قورسایی سیاسی و ھەڵبژاردنی ھەیە و لەپرۆسەی سیاسیدا کاریگەرە. دەمانەوێت ریزەکان یەک بخەینەوە لەپێناو داھاتوو، چونکە قۆناخێکی قورسە".
لەھەڵبژادنی پێشوەختەی پەرلەمانی عێراق، رەوتی سەدر بە بەدەستھێنانی 73 کورسی براوەی یەکەمی ھەڵبژاردنە و سوورە لەسەر ئەوەی حکومەتی زۆرینە پێکبھێنێت.
زۆربەی خەڵک لەگەڵ حکومەتی زۆرینەیە ، بەڵام دەشڵێن رەوشی ئێستای عێراق پێویستی بە حکومەتێکی سازانی نیشتمانییە.
قاسم جابر سودانی، مامۆستای زانکۆ دەڵێت: "پێویستە حکومەتی شەراکەت پێکبھێنرێت بۆچی چونکە ناتوانرێت ھیچ لایەنێکی عێراقی پشتگوێ بخرێن، تەنانەت ئەگەر یەک پێکھاتەش بێت سەرکردەی گەورەیان تێدایە حیزبی گەورە و کاریگەرن بۆیە پێویستە شەراکەت بێت".
ئەحمەد محەممەد فەرمانبەر دەڵێت: "کێشە لەحکومەت و پێکھێنانی حکومەت دروست دەبێت ، بۆیە پێویستە ھەموو حیزب و لایەنەکان رێکبکەون و کەسێک ھەڵبژێرن، باشترە تا لەم بازنەی خولانەوەیە نەجاتمانبێت".
سەفا محەممەد، مامۆستا دەڵێت: "شەراکەتی نیشتمانیی راستەقینە، باشترە بۆ پێکھێنانی حکومەت کە لەخزمەت و بەرژەوەندیی وڵاتدابێت باشترە بێگومان".
دوای نزیکەی سێ مانگ لە بەڕێوەچوونی هەڵبژاردنی پێشوەختەی پەرلەمانی عێراق، بڕیارە 9ی ئەم مانگە خولی پێنجەمی پەرلەمانی عێراق کۆببێتەوە ، لەکاتێکدا کە ھێشتا کورد سوننە و شیعە لەسەر پۆستەکانی سەرۆککۆمار، سەرۆکوەزیران و سەرۆکی پەرلەمان لە نێو خۆیاندا رێکنەکەوتوون .
08:56
یەکەمین دانیشتنی خولی پێنجەمی پەرلەمانی عێراق
رووداو
رووداو دیجیتاڵ
رۆژی یەکشەممە کاژێر 11:00ی بەیانی، کۆبوونەوەی پەرلەمانی عێراق دەستپێدەکات و پەرلەمانتارە نوێیەکان سوێندی یاسایی دەخۆن، هەر پەرلەمانتارێکیش لەماوەی یەک مانگدا پەیوەندیی بە پەرلەمانەوە نەکات و سوێندی یاسایی نەخوات مافی پەرلەمانتاریی نامێنێت و بەربژێری دوای ئەو جێگەکەی دەگرێتەوە.
لە یەکەمین کۆبوونەوەدا، مەحموود مەشهەدانی کە سەر بە هاوپەیمانی عەزمە و بەتەمەنترین پەرلەمانتارە، سەرۆکایەتیی یەکەمین کۆبوونەوەی پەرلەمان دەکات.
لەم چەند رۆژەدا، کۆبوونەوەی نێوان لایەنە سیاسییەکان بۆ پێکهێنانی حکومەتی نوێی عێراق و دروستکردنی گەورەترین فراکسیۆن و دیاریکردنی پۆستی سەرۆکی پەرلەمانی گەرمتربووە، شاندێکی هەرێمی کوردستان کە لە یەکێتی و پارتی پێکهاتووە لە بەغدان و لەگەڵ لایەنەکان چەند کۆبوونەوەیەکیان کردووەو لە کۆبوونەوەکانیشیان بەردەوامن، گەورەترین ئاستەنگیش کە رۆژی یەکشەممە رووبەڕووی پەرلەمانی نوێی عێراق دەبێتەوە، دیاریکردنی پۆستی سەرۆکی پەرلەمانە کە تاوەکو ئێستا هیچ رێککەوتنێکی کۆنکرێتی لەو بارەوە نەکراوەو سووننەکان چەند بەربژێرێکیان بۆ ئەو پۆستە هەیە لە نێویاندا محەممەد حەلبووسی و مەحموود مەشهەدانی.
بەپێی بڕیاری دادگای فیدراڵی نابێت لەم خولەدا، دانیشتنی پەرلەمان هاوشێوەی ساڵی 2018 بە کراوەیی بهێڵدرێتەوە، بەڵکو دەبێت لە یەکەم رۆژدا پرسی سەرۆکی پەرلەمان یەکلایی بکرێتەوەو سەرۆکی پەرلەمان دیاربکرێت.