ئەمریکا بەرپرسیاریێتی هێرشەکەی بەغدا لە ئەستۆ دەگرێت

 

فەرماندەی ناوەندی هێزەکانی ئەمریکا – سێنتکۆم لە راگەیێندراوێکدا بەرپرسیارییەتی خۆی لە ئەنجامدانی هێرشەکەی بەغدا راگەیاند و گوتی،  کاژێر 9:30 خولەکی ئێوارەی رۆژی 7ـی شوبات، "فەرماندەیەکی کەتائیبی حیزبوڵڵا کە بەرپرسیاریێتی راستەوخۆی لە پلاندانان و بەشداریکردن لە هێرشکردنە سەر هێزەکانی ئەمریکا لە ناوچەکە هەبووە، کوژراوە. تاوەکو ئێستا هیچ ئاماژەیەک بۆ زەرەر و زیان و قوربانییانی مەدەنی نییە."

 

سوپای ئەمریکا هەروەها دەشڵێت، "ئەمریکا بەردەوام دەبێت لە گرتنەبەری هەنگاوی پێویست بۆ پاراستنی گەلەکەمان. ئێمە دوودڵ نابین لەوەی کە ئەو کەسانەی هەڕەشە دەخەنە سەر سەلامەتی هێزەکانمان رووبەڕووی بەرپرسیارییەتی بکەینەوە."

 

شەوی چوارشەممە، 07-02-2024، دەنگی سێ تەقینەوە لە بەغدا بیستران. هەروەها ئەنمار غازی، پەیامنێری رووداو لە بەغدا گوتی، "لە هێرشەکەدا بەپێی زانیارییە سەرەتاییەکان دوو سەركردەی حیزبوڵڵای عێراقی کراونەتە ئامانج و کوژراون، کە یەكێکیان ناوی ئەبو باقر ساعدییە و ئەوەی دیکە ئەرکان عەلیاویە."