رووداو ناوی دامەزراوانی کۆلێژ و پەیمانگە پزیشکییەکان بڵاودەکاتەوە

هێمن بابان رەحیم
رووداو دیجیتاڵ
 
وەزارەتی تەندروستیی عێراق ناوی نزیکەی 30 هەزار دەرچووی بڵاوکردەوە کە دادەمەزرێندرێن و بەشێکیان دەرچووانی زانکۆ و پەیمانگەکانی هەرێمی کوردستانن.
 
سەرۆکی لێژنەی تەندروستیی پەرلەمانی عێراق دەڵێت، "هەوڵ هەیە بۆ ئەوەی ئەوانەی ناویان لە لیستەکەدا نییە دابمەزرێن".
 
وەزارەتی تەندروستی عێراق ناوی 29 هەزار و 882 دەرچووی زانکۆ و کۆلێژ و پەیمانگە پزیشکی و تەندروستی و پەرستارییەکانی بڵاوکردەوە کە بە ژمارەیەک لیست بۆ دامەزراندن بۆ ئەنجوومەنی فیدڕاڵیی خزمەت بەرزکرابوونەوە و ئەنجوومەنەکە رەزامەندیی لەسەر دابوون.
 
ئەو دەرچووانە، بەپێی یاسای پلەبەندیی پزیشکیی ژمارە 6ـی ساڵی 2000 دادەمەزرێندرێن، لە دەرچووانی زانکۆ و پەیمانگەکانی ناوەوە و دەرەوەی عێراقن لە دامەزراوەکانی حکومی و ناحکومی.
 
ماجد شنگالی، سەرۆکی لێژنەی تەندروستیی پەرلەمانی عێراق بە تۆڕی میدیایی رووداوی گوت، "بەشێکی ئەوانەی دادەمەزرێندرێن لە دەرچووانی زانکۆ و پەیمانگەکانی هەرێمی کوردستانن، هەوڵدەدەرێت لە ئایندەدا ئەوانەی ماون دابمەزرێندرێن، چونکە لیستەکە ناوی سەرجەم دەرچووانی تێدا نییە ئەوانەی فۆرمی دامەزراندنیان پڕکردەوە".
 
دەرچووانی زانکۆ و پەیمانگەکانی هەرێمی کوردستان دانیشتووی پارێزگاکانی کەرکووک، نەینەوا، سەڵاحەدین، دیالەن.
 
وەزارەتی تەندروستی داوای لەو کەسانە کردووە کە ناوەکانیان هاتووەتەوە سەردانی بەڕێوەبەرایەتی کاروباری کارگێڕی و دارایی و یاسایی لە وەزارەتی تەندروستی بکەن بەمەبەستی تەواوکردنی رێککارەکانی دامەزراندن.
 
 ئەمانەی خوارەوە ناوی دامەزراوانە:
 
1-دەرچووانی زانکۆ و پەیمانگەکانی هەرێمی کوردستان:
 
2- پزیشکیی گشتی (ناوەوە و دەرەوەی عێراق): 
 
3-ئامادەییەکانی پەرستاری:
 
4-کۆلێژی تەکنیکی (دەرەوەی عێراق): 
 
5- کۆلێژی تەکنیکی (ناوەوەی عێراق):
 
6-کۆلێژی پەرستاری (دەرەوەی عێراق):
 
7- کۆلێژی پەرستاری (ناوەوەی عێراق):
 
8-پەیمانگەی تەکنیکی (دەرەوەی عێراق):
 
9- پەیمانگەی تەکنیکی (ناوەوەی عێراق):
 
10-پەیمانگەی پەرستاری (دەرەوەی عێراق):
 
11- پەیمانگەی پەرستاری (ناوەوەی عێراق): 
 
ئەنجوومەنی باڵای خزمەتی گشتیی فیدراڵی بە نووسراوی ژمارە 50/112/6130 کە رۆژی چوارشەممە، 4ـی ئەیلوولی 2024 بە ناونیشانی "زۆر بەپەلە" رەوانەی وەزارەتی تەندروستیی عێراقی کردووە، رەزامەندی لەسەر دامەزراندنی 29 هەزار و 882 کەس لە دەرچووانی کۆلێژ و پەیمانگە و بەشە پزیشکی و تەندروستی و پەرستارییەکان نیشان دا.
 
ژمارەی دەرچووانی بەشە پزیشکی و تەندروستییەکان 61 هەزار کەسە، لەو ژمارەیە 57 هەزار و 464 دەرچووى بەشە پزیشکییەکان فۆرمیان پڕکردووەتەوە، بەڵام وەزارەتەکانی دارایی عێراق و تەندروستی رەزامەندییان لەسەر دامەزراندنی 29 هەزاریان داوە.