رووداو دیجیتاڵ
فەرماندەی ئۆپەراسیۆنەکانی بەغدا رایگەیاند، لە ئۆپەراسیۆنێکدا لە باشووری شاری بەغدا، ژمارەیەک داواکراویان دەستگیر کردووە، هەروەها دەستیان بەسەر چەندین تەقەمەنی و کەرەستەی تەقینەوەدا گرتووە.
سێشەممە 6ی ئابی 2024 فەرماندەیی ئۆپەراسیۆنەکانی بەغدا لە بەیاننامەیەکدا رایگەیاند، لە چوارچێوەی ئەو پلانانەی بۆ بەهێزکردنی ئاسایش و سەقامگیری لە دەوروبەری پایتەخت داڕێژراون، یەکەکانی فیرقەی حەوتی پیادە و یەکەی تایبەت و دەزگا ئەمنییەکان، ئۆپەراسیۆنێکی گەڕان و پشکنینیان لە گوند و ناوچەکانی باشووری پایتەخت کردووە.
بەپێی بەیاننامەکە، "لە ئۆپەراسیۆنەکەدا ژمارەیەک تۆمەتبار و داواکراو دەستگیر کراون. هەروەها دەستگیراوە بەسەر کۆمەڵێک تەقەمەنی و کەرەستەی تەقینەوەدا، کە پاشماوەی چەکدارانی داعش بوون."
فەرماندەییەکە ئاماژەی بەوە داوە، ئۆپەراسیۆنەکەیان هاوکاتە لەگەڵ نزیکبوونەوەی رێوڕەسمی چلەی ئیمام حوسێن، بۆیە ئامانجیان پتەوکردنی ئەمنییەتی شارەکان و وشککردنی سەرچاوەکانی تیرۆرە، "بۆئەوەی گیانی هاووڵاتییان و زیارەتکاران پارێزراو بێت."
شانە نووستووەکانی داعش لە چالاکی بەردەوامن. بەپێی توێژینەوەیەکی سەنتەری رافیدەین بۆ دیالۆگ، کە سەنتەرێکی عێراقییە، لە ساڵی 2023دا داعش 189 هێرشی لە ناوچە جیاجیاکاندا کردووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ