گڕی کێڵگە نەوتییەکانی بەسرە 'نیعمەت' و نەگبەتییە بۆ پارێزگاکە

 

فەلاح عامرى، ئەندامى هاوپەیمانیى بەسرە بۆ پاراستنى ژینگە دەڵێ "پەیوەندى لەنێوان ئەو نەخۆشیانەى ئێستا هەن، لەوانە نەخۆشییەکانی گورچیلە، شێرپەنجە، نەخۆشییەکانى کۆئەندامى هەناسە لەگەڵ دەرهێنانى نەوت، هەیە، ئەمە نکۆڵیی لێناکرێت." 

 

بەگوێرەى ئامارە فەرمییەکان، ساڵانە نزیکەى 900 کەس لە بەسرە تووشی شێرپەنجە دەبن، کە دواى نەینەوا، دووەم زۆرترین تووشبووى ئەو نەخۆشییەى تێدایە لەسەر ئاستى عێراق. 

  

موعتەز حیکمەت، چالاکڤانى ژینگەیی دەڵێ "دەبێت کەمکردنەوەى دەردراوە ژەهراوییەکان لە دامەزراوە نەوتییەکان لە قۆناخى نەخشەی بنەڕەتی بکرێت، نەوەک دواى دەردانى گازە پیسکەرەکان کە بەسرە گیرۆدەى بووە." 

 

لە رێگەى گرێبەست لەگەڵ کۆمپانیا بیانییەکان، رێژەى سووتانى گازى هاوەڵ لە کێڵگەکانى نەوتى بەسرە لە 50%ـەوە بۆ 38% کەمبووەتەوە. 

 

عەلى شداد، ئەندامى لیژنەى نەوت و گازى پەرلەمانى عێراق گوتی "عێراق دووەم هەناردەکاری وڵاتانى ئەندامى ئۆپێکە، بەڵام بەداخەوە لە وەبەرهێنانى گازدا دواکەوتووە. ئەوە پابەندییەتى زۆر بەسەر عێراقدا دەسەپێنێت بە گوێرەى رێککەوتننامە نێودەوڵەتییەکان."  

 

رێژەی 73%ـی نەوتى عێراق لە بەسرە دەردەهێندرێت، رۆژانە زیاتر لە 950 ملیۆن پێ سێجا گازیش بەرهەمدەھێنێت، کە زۆرینەى ئەو گازە هاوەڵەیە، کە بەفیڕۆچوونى بە هۆکارى پیسبوونى ژینگەى پارێزگاکە دەزانرێت.