لە دیالە تەرمی کچێک دۆزرایەوە؛ 'باوکی تەرمەکەی بردووەتە بنکەی پۆلیس'

 

عەقید هەیسەم سەلمان شەممەری، گوتەبێژی پۆلیسی پارێزگای دیالە رۆژی پێنجشەممە 06-06-2024 بە تۆڕی میدیایی رووداوی گوت: کاژێر 19:30 خولەکی 05-06-2024  بنکەی پۆلیسی نای سەر بە پۆلیسی ناحیەی عوزێم ئاگادارکرایەوە، کچێک کۆتای بە ژیانی خۆی هێناوە.

 

گوتەبێژی پۆلیسی پارێزگای دیالە گوتی، "باوکەکە ناوی عامر زەعل عەسفوورە تەرمی نوسرەت-ی کچی کە لە دایکبووی 1998ـە، لەگەڵ خۆیدا بردووەتە بنکەی پۆلیس نای." بەگوتەی باوکەکە "باری دەروونی کچەکەی تەواو نەبووە"، بە چەکی کڵاشینکۆڤ دوو گوللەی لەسەری خۆیداوە و کۆتایی بە ژیانی خۆی هێناوە. 

 

عەقید هەیسەم سەلمان شەممەری دەڵێت، تەرمەکە دەستبەجێ رەوانەی دادپزیشکی بەعقوبە کراوە. رێکاری یاسای گیراوەتەبەر. تیمی بەڵگەی تاوان چوونەتە شوێنی رووداوەکە و دەستیان بەسەر  کڵاشینکۆفەکە داگرتووە، لێکۆڵینەوەش لە رووداوەکە بەردەوامە.