پەیامنێری رووداو لە بەغدا رایگەیاند، پەرلەمان دەنگی بە بەرنامەی کابینەکەی مستەفا کازمی دا چەند وەزیرێک پەسندکران.

 

 

فەریق یەکەم عوسمان عەلی غانمی، وەزیری ناوخۆ

 

فەریقی روکن جومعە عناد سەعدوون، وەزیری بەرگری

 

نازه‌نین محه‌ممه‌د وسو، وەزیری ئاوه‌دانكردنه‌وه‌ و نیشتەجێکردن و شارەوانییەکان

 

حەسەن محەممەد عەباس، وەزیری تەندروستی و ژینگە

 

نەبیل کازم عەبدولساحیب، وەزیری خوێندنی باڵا

 

عەدنان درجال موته‌ر، وەزیری لاوان و وەرزش

 

ئەرکان شەهاب ئەحمەد، وەزیری گەیاندن

 

ناسر حوسێن بەندەر، وەزیری گواستنەوە

 

عەلی عەبدولئەمیر عەلاوی، وەزیری دارایی

 

عەلی حەمید دلێمی، وەزیری پەروەردە

 

ماجد مەهدی حەنتووش، وەزیری کارەبا

 

مونهەل عەزیز، وەزیری پیشەسازی و کانزاکان

 

خالید بەتال نەجم، وەزیری پلاندانان

 

عادل حاشووش رکابی، وەزیری کار و کاروباری کۆمەڵایەتی

 

مەهدی رەشید مەهدی، وەزیری سەرچاوەکانی ئاو

 

 

ئەو وەزیرانەی دەنگیان لەسەر نەدرا:

 

عەلی نەوار نەسیف، بەربژێر بۆ وەزیری بازرگانی

 

هیشام ساڵح، بەربژێر بۆ وەزیری رۆشنبیری

 

عەلی ئیسماعیل، بەربژێر بۆ وەزیری کشتوکاڵ

 

حیکمەت ناسر، بەربژێر بۆ وەزیری کۆچ و کۆچبەران

 

عەبدولڕەحمان مستەفا فەتاح، بەربژێر بۆ وەزیری داد

 

 

کۆبوونەوەی پەرلەمانی عێراق بەردەوامە، سێ پەرلەمانتار سوێندی یاساییان خوارد و مستەفا کازمی کابینە وەزارییەکەی پێشکەشدەکات. 

 

ئەو سێ پەرلەمانتارە بریتین لە رێزان شێخ دلێر لە جێگەی د. میران عەباس، حەسەن عەباس شووەرت لە جێگەی ئەیاد هاشم عەللاوی و عەلی غەرکان حوسێن لە جێگەی مەحموود تەلال.

مستەفا کازمی دەڵێت، حکومەتەکەی حکومەتی چارەسەرکردنی قەیرانەکان دەبێت. هاوکات کار بۆ ئەنجامدانی هەڵبژاردنێکی پێشوەختە و بێگەرد دەکات. 

سەرۆکوەزیرانی راسپێردراوی عێراق ئاماژەی بەوەشکرد، قبووڵناکەن عێراق ببێتە گۆڕەپانی یەکلاکردنەوەی دووبەرەکییەکان.

 

مستەفا کازمی راشیگەیاند، کابینەکەم کار بۆ پتەوکردنی پەیوەندییەکان لەگەڵ هەرێمی کوردستان بەپێی دەستوور دەکات و وەکو عێراقییەکان دەتوانین لە بەسرەوە بۆ کوردستان بپارێزین.  

 

هەڵکەوت عەزیز، پەیامنێری رووداو لە بەغدا رایگەیاند، کۆبوونەوەی پەرلەمانی عێراق بە بەشداری 255 ئەندام پەرلەمان بۆ دەنگدان بە کابینەی مستەفا کازمی دەستیپێکرد.

 

 

یوسف محەممەد، سەرۆکی فراکسیۆنی گۆڕان لە پەرلەمانی عێراق رایدەگەیێنێت، "‏وه‌ك فراكسیۆنی گۆڕان ده‌نگ ناده‌ین به‌ حكومه‌تی نوێ، چونكه‌ هیچ گه‌ره‌نتییه‌ك نییه‌ بۆ ده‌سته‌به‌ربوونی مافه‌كانی خه‌ڵكی كوردستان و، چاره‌سه‌ركردنی دۆخی ناوچه‌ جێناكۆكه‌كان".

 

یوسف محەممەد ئەوەشی گوتووە، ئه‌م كابینه‌یه‌ درێژكراوه‌ی كابینه‌كانی پێش خۆیه‌تی و "نه‌یتوانی كێشه‌ بوونیادییه‌كانی پێشوو تێپه‌ڕێنێت".

 

 

 

مستەفا کازمی، سەرۆکوەزیرانی راسپێردراوی عێراق لە توویتێکدا بە زمانی کوردی رایدەگەیێنێت، لیستى ناوى ئەندامانى کابینە پێشنیازکراوەکەی ناردووە بۆ پەرلەمان و چاوەڕوانن دەنگدانى لەسەر ئەنجامبدرێت.

 

مستەفا کازمی دەشڵێت، هەوڵیداوە باشترین بەربژێر بۆ وەزارەتەکان هەڵبژێرێت، بە هیواى متمانە پێبەخشینیان. "ئامانجمان خزمەتکردن و دابینکردنى ئارامى و دادپەروەرى و خۆشگوزەرانییە بۆ گەلى عێراق".

 

کازمی لە توویتەکەیدا بە زمانی عەرەبی نووسیویەتی، هەوڵی داوە بەربژێرەکانی جێگەی رەزامەندی سیاسییەکان، ئەندامانی پەرلەمان و گەلی عێراق بێت. 

 

کابینەکەی مستەفا کازمی پێویستی بە دەنگی 165 پەرلەمانتارە، پەیامنێری رووداو لە بەغدا رایگەیاند، تاوەکو ئێستا 150 پەرلەمانتار چوونەتە هۆڵی پەرلەمان. 

 

پەیامنێری رووداو ئاماژەی بەوەشکرد، پەرلەمانتارانی دەوڵەتی یاسا نەچوونەتە هۆڵی پەرلەمان.

 

بڕیارە پەرلەمانی عێراق بەناوی گەلەوە متمانە بە کابینە پڕ مشتومڕەکەی شەشەمین سەرۆکوەزیرانی عێراقی نوێ بدات، بەڵام 75 پەرلەمانتار و بەشێک لە خۆپێشاندەران رازی نین، ئەو پەرلەمانتارانە بڕیاریانداوە دەنگی پێنەدەن. 

 

لە ماوەی 5 مانگی دەستلەکارکێشانەوەی عادل عەبدولمەهدی، ناکۆکی قووڵی پێنج لایەنی سەرەکیی شیعە دوو سەرۆکوەزیرانی راسپێردراوی ناچار بە کشانەوە کرد و دوای دەیان کۆبوونەوە و مشتومڕی دوور و درێژ، بەشێک ناڕازی لە چۆنیێتی دابەشکردنی پۆستەکان، هەڕەشەی ئۆپۆزیسیۆنبوون دەکەن.

 

کازم شەمەری، سەرۆکی لیستی هاوپەیمانیی وەتەنیە دەڵێت، "ئێمە بڕیارمانداوە دەنگ بەم کابینە وەزارییە نەدەین و ناچین بۆ دانیشتنی پەرلەمان، ئەگەر ئەم کابینەیەش دەنگی ھێنا ئەوا ئێمە دەبینە یەکەم ھێزی سیاسی کە رێچکەی ئۆپۆزیسیۆنبوونی ئاشتی دەگرێتەبەر لە پەرلەمان".

 

لەنێو خۆپێشاندەرانیش دەنگی ناڕازی هەیە، عەلی عیمران خۆپێشاندەرە و دەڵێت، "رازی نابین، چونکە ئەوان لەلایەن خۆیانەوە کەس دێنن و دایدەنێن".

 

کازمی بۆ وەرگرتنی متمانە، لانیکەم پێویستی بە 166 دەنگە، ئەگەر هاوکێشە سیاسییەکان گۆڕانی بەسەردا نەیەت، کازمی بە 21 کورسیی بەدر، 19 کورسیی حیکمە، 43 کورسیی نەسر، 54 کورسیی سائیرون، 13 کورسییەی لایەنگری سەرۆکی پەرلەمان و 58 کورسیی کورد بێکێشە دەتوانێ متمانە وەربگرێ.

 

 

سەرچاوەیەک لە پەرلەمانی عێراق بە رووداوی راگەیاند، سێ وەزارەت لە کابینەکەی کازمی بۆ کورد دانراون و ناوی وەزیرەکانیش بەمشێوەیە: 

 

فوئاد حوسێن  بەربژێر بۆ وەزیری دەرەوە

 

خالید شوانی  بەربژێر بۆ وەزیری داد 

 

نازەنین محەممەد بەربژێر بۆ وەزارەتی ئاوه‌دانكردنه‌وه‌ و نیشتەجێکردن و شارەوانییەکان


پرۆفایلی وەزیرەکان:

 

 

فوئاد حوسێن

لەدایکبووی 1949 لە خانەقین

1967 بووە ئەندامی پارتی دیموکراتی کوردستان

1974 پەیوەندی بە ریزەکانی پێشمەرگەی کوردستان کرد

دکتۆرای لە زانستی سیاسی لە هۆڵەندا بەدەستهێناوە

1976 بووە سکرتێری کۆمەڵەی خوێندکاران لە دەرەوە

1978 بووە ئەندامی پەیمانگەی کوردی لە پاریس

2005 بووە سەرۆکی دیوانی سەرۆکایەتی هەرێمی کوردستان

2018 بووە وەزیری دارایی عێراق


خالید سەلام شوانی 

لەدایکبووی 1975 لە کەرکووک

ماستەری لە یاسای دەستووریی هەیە

2014 راوێژکاری یاسایی سەرۆککۆماری عێراق بوو

2006-2014 ئەندامی پەرلەمانی عێراق بوو

ئەندامی سەرکردایەتیی یەکێتیی نیشتمانیی کوردستانە

وەزیری هەرێمە لە حکومەتی هەرێمی کوردستان


نازه‌نین محه‌ممه‌د وسو

لەدایکبووی 1959 لە هه‌ولێر

بەكالۆریۆسی له‌ ئه‌ندازیاریی شارستانی هەیە

ئه‌ندامی سه‌ركردایه‌تیی پارتیی دیموكراتی كوردستانه‌

وه‌زیری پێشووی شاره‌وانییه‌كانە لە هه‌رێمی كوردستان

 

هەڵکەوت عەزیز، پەیامنێری رووداو لە بەغدا رایگەیاند، تاوەکو ئێستا رێککەوتنی کۆتایی لەسەر کابینەکەی کازمی نەکراوە "هەر یەکە لە کوتلەکەی قەیس خەز عەلی، دەوڵەتی یاسای نووری مالیکی و کوتلەکەی ئەیاد عەللاوی دژی دەنگدانن بە کابینەکەی مستەفا کازمی". 

 

بەگوتەی پەیامنێری رووداو ئەوانەی تاوەکو ئێستا ماونەتەوە سائیروون، لایەنە کوردستانییەکان و بەشێکی زۆری سووننەکانن. 

 

 

 

پەیامنێری رووداو لە بەغدا رایگەیاند، دانیشتنی پەرلەمانی عێراق بۆ دەنگدان بە کابینەکەی مستەفا کازمی یەک کاژێر دواخرا. 

 

 

بڕیارە کاژێر 09:00 بەدواوە کۆبوونەوەی پەرلەمانی عێراق بۆ دەنگدان بە کابینەکەی مستەفا کازمی بەڕێوەبچێت و بۆ ئەو مەبەستەش محەممەد حەلبووسی، سەرۆکی پەرلەمانی عێراق و مستەفا کازمی، سەرۆکوەزیرانی راسپێردراوی عێراق گەیشتنە پەرلەمان. 

هاوکات بەشێک لە پەرلەمانتارانی عێراقیش گەیشتوونەتە هۆڵی پەرلەمان.

 

بەشیر حەداد، جێگری سەرۆکی پەرلەمانی عێراق رایدەگەیێنێت، هیچ ئەگەرێک نییە بۆ دواخستنی کۆبوونەوەی ئەمڕۆی پەرلەمان بۆ پێدانی متمانە بە کابینەی نوێی حکومەتی عێراق بە سەرۆکایەتیی مستەفا کازمی.

 

بەشیر حەداد، ئەمڕۆ چوارشەممە بە تۆڕی میدیایی رووداوی راگەیاند، "هیچ ئەگەرێک نییە بۆ دواخستنی کۆبوونەوەی ئەمڕۆی پەرلەمان بۆ پێدانی متمانە بە حکومەتی نوێ، بۆیە پەرلەمان کاژێر 09:00ـی ئەمشەو کۆدەبێتەوە، بەڵام ئەگەر رێژەی یاسایی ئامادەبووان بەدینەهات، ئەوا کۆبوونەوەکەی پەرلەمان دوادەخرێ".

 

بەشیر حەداد راشیگەیاند، "دوا لیستی ناوی بەربژێران بۆ وەزارەتەکان کە بۆ پەرلەمان نێردراوە ناوی 20 بەربژێری تێدایە بۆ 20 وەزارەت، بەڵام بەربژێران بۆ وەزارەتەکانی دەرەوە و نەوت دەستنیشان نەکراون، هاوکات هێشتا هیچکام لە وەزارەتەکانی دەرەوە و دارایی بۆ کورد یەکلانەکراونەتەوە".

 

جێگری سەرۆکی پەرلەمانی عێراق ئاشکراشیکرد، "بەپێی ئەو لیستەی بۆ پەرلەمان نێردراوە، عەبدولڕەحمان مستەفا فەتاح، پارێزگاری پێشووتری کەرکووک بەربژێرە بۆ پۆستی وەزیری دارایی".

 

بەپێی دەستوور، کابینەی نوێی عێراق بەسەرۆکایەتی مستەفا کازمی تەنیا 50 +1ـی دەنگی 329 ئەندامەکەی پەرلەمانی پێویستە بۆ بەدەستهێنانی متمانە.

 

حکومەتی نوێی عێراق لە 22 وەزارەت پێکدێت و چاوەڕوان دەکرێ 12 وەزارەتیان بدرێنە شیعە، 6 وەزارەتیان بدرێنە سووننە، 3 وەزارەتیان بدرێنە کورد و دوو وەزارەتیان بدرێنە پێکهاتەکانی تورکمان و کریستیان.

 

کازمییە، ناوچە بەناوبانگ و تاڕادەیەک دەوڵەمەندنشینەکەی بەغدا چاوەڕێیە کەسێک لە دانیشتووانەکەی بگاتە سەر کورسیی دەسەڵات و ببێتە شەشەم سەرۆکوەزیرانی شیعەی عێراق.

 

53 ساڵ لەمەوبەر مستەفا کازمی کە ئێستا راسپێردراوە بۆ پێکھێنانی کابینەی نوێی حکومەتی عێراق لە گەڕەکی نوابە لە ناوچەی کازمیە لەدایکبووە، بە گوتەی خەڵکی ناوچەکە، کازمی ھەر لە منداڵییەوە حەز و خولیای دەسەڵاتی ھەبووە، ھەمیشە پێشەنگی منداڵانی ناوچەکە بووە.

 

کازمی ناوی تەواوی مستەفا عەبدولـلەتیف مشەتت غەریباوییە، لە بنەڕەتدا خەڵکی شەتڕەی پارێزگای زیقارە، باوکی رووپێوکار و چاودێری هونەری بووە، ساڵی 1963 بۆ پەرەپێدانی کارەکەی بە یەکجاری هاتووەتە بەغدا.

 

ئەحمەد مەشات، فەرمانبەری خانەنشین 78 ساڵی تەمەنی تێپەڕاندووە و ئەوەندەی بیری بڕدەکات لەسەر کازمی دێتەگۆ و دەڵێ "زۆربەی ئەوانەی لە کازمیە نیشتەجێ دەبن، جۆرێک لە پابەندبوونی ئایینی مەزھەبییان ھەیە، ئەمەش بۆ گەیشتن بە ئامانجەکانیان، کازمیش لەو جۆرە گەنجانە بوو کە زۆر گەرموگوڕیی پێوە دیاربووە، بۆ نمونە بۆچی ناچن بۆ شارێکی دیکە، چونکە ئینتیمای مەزھەبی ئەوان دێنێت بۆ ئێرە، كازمى لە بەغدا خوێندنی دواناوەندیی تەواوکردووە، دواتر ئاوارەی دەرەوە بوو، دوای رووخانی رژێم گەڕایەوە".

 

کازمی لەجیاتی چوونە زانکۆ، لە تەمەنی 18 ساڵیدا لە رێگەی هەرێمی کوردستانەوە، خۆی دەگەیێنێتە ئەوروپا و دواتر لە بەریتانیا دەگیرسێتەوە.

 

لە دەرەوە، وەکو رۆژنامەڤان و ئۆپۆزیسیۆنێکی سەددام، هاوکاریی لایەنە شیعەکانی کردووە، نووسەرە و "پرسی عێراق" و "ئاشتی لەنێوان رابردوو و داهاتوو" دوو لە گرنگترین کتێبەکانیەتی.

 

دوای رووخانی بەعس، کازمی دەگەڕێتەوە عێراق، لە تەمەنی 45 ساڵی و لە زانکۆیەکی ئەهلی، بەشی یاسا تەواودەکات و تاوەکو ساڵی 2016 کە دەبێتە سەرۆکی دەزگای هەواڵگری، لە کاری رۆژنامەڤانی بەردەوام دەبێت؛ ھاوڕێکانی بە کەسێکی ھێمن و لەسەرخۆ وەسفی دەکەن.

 

نیبراس مەعموری، سەرۆکی کۆڕبەندی ژنانی راگەیاندنکار لەبارەی کازمیەوە دەڵێ "پیاوێکی زۆر لەسەرخۆیە، کەم قسە دەکات، ھەمیشە دەم بەخەندەیە، کاتێک گفتوگۆ دەکات گوێ لە بەرامبەر دەگرێت، ئینجا گفتوگۆ دەکات، ئەمە کارێکی زۆر باشە، کەم کەسایەتی ئەم سیفاتەیان تێدایە، پشت بە پەیوەندییە سەرکەوتووەکانی دەبەستم، لەڕووی دیپلۆماسی و پەیوەندییەوە بە ھەر دە پەنجە بۆی مۆر دەکەم، زۆر سەرکەوتووە".

 

کازمی خێزاندارە و دوو منداڵی هەیە، هەرچەندە بە کەسێکی بێلایەن ناودەبرێت، بەڵام زاوای مەهدی عەلاقی سەرکردەی حیزبی دەعوە و ئەمینداری گشتیی پێشووی ئەنجوومەنی وەزیرانی عێراقە، دوو لە براکانی پلەی راوێژکاری سەرۆکوەزیرانیان هەبووە و خۆیشی لە سەردەمی عەبادییەوە تائێستا سەرۆکی دەزگای هەواڵگریی عێراقە.