رووداو دیجیتاڵ
نێردەی تایبەتی سەرۆکی رووسیا و سکرتێری ناتۆ بە جیا لەگەڵ محەممەد شیاع سوودانی، سەرۆکوەزیرانی عێراق کۆبوونەوە و سوودانییان بانگهێشتی لوتکەی عەرەبی-رووسی و کۆبوونەوەی ناتۆ کردووە. جێگری سەرۆککۆماری ئێرانیش لە عێراقە.
محەممەد شیاع سوودانی، سەرۆکوەزیرانی عێراق، دوێنێ چوارشەممە لەگەڵ میخائیل بۆگدانۆڤ، نێردەی تایبەتی سەرۆکی رووسیا بۆ رۆژهەڵاتی ناوەڕاست و باکووری ئەفریقا کۆبووەوە. بەگوێرەی راگەیێندراوێکی نووسینگەی سوودانی، لە دیدارەکەدا پەیوەندییە دوو قۆڵییەکانی نێوان عێراق و رووسیای فیدراڵی و رێگاکانی پەرەپێدانیان لە بوارە جیاوازەکاندا تاوتوێ کران.
دۆخی ناوچەیی و نێودەوڵەتی و هەوڵەکان بۆ چەسپاندنی سەقامگیری لە ناوچەکەدا تەوەرێکی دیکەی کۆبوونەوەکە بوو.
نێردەی تایبەتی سەرۆکی رووسیا بانگهێشتی سوودانی کرد بۆ بەشداریکردن لە لوتکەی عەرەبی-رووسی کە بڕیارە رووسیا میوانداری بکات، سەرۆکوەزیرانی عێراق رەزامەندی سەرەتایی دەربڕی.
بەگوێرەی راگەیێندراوی نووسینگەی سەرۆکوەزیرانی عێراق، سوودانی جەختی لەوە کردەوە، حکومەت خواستی هەیە پەیوەندییەکانی نێوان هەردوو وڵات پەرە پێبدات و ئاسۆی هاوکاری لە بوارە جیاوازەکاندا فراوانتر بکات.
بۆگدانۆڤ سڵاوی سەرۆکی رووسیا، ڤلادیمیر پووتینی، بە سوودانی گەیاند و خواستی حکومەتی وڵاتەکەی بۆ کاراکردنی یاداشتەکانی لێکتێگەیشتنی دووقۆڵی دەربڕی، وەک ئامادەکارییەک بۆ کۆبوونەوەی دەیەمی لیژنەی هاوبەشی عێراقی-رووسی کە بەم نزیکانە دەکرێت و ئەرکی جێبەجێکردنی رێککەوتن و یاداشتەکانی لێکتێگەیشتنی نێوان هەردوو وڵات دەگرێتە ئەستۆ.
هەر دوێنێ چوارشەممە، سوودانی لەگەڵ مارک رووتە، سکرتێری گشتیی هاوپەیمانی باکووری ئەتڵەسی (ناتۆ) و شاندی یاوەری کۆبوونەوە.
لە دیدارەکەدا، پەیوەندییەکانی هاوکاریی نێوان عێراق و ناتۆ لەو دۆسیانەی کە پەیوەندییان بە بنیاتنانی تواناکان و پشتیوانی هێزە چەکدارەکانی عێراقەوە هەیە لە بوارەکانی راوێژ و راهێناندا، تاوتوێ کران.
سەرۆکوەزیرانی عێراق جەختی لە گرنگی بەردەوامی پەیوەندییەکان کردەوە بۆ بنیاتنانی پەیوەندی هاوکاری لەگەڵ ناتۆ.
سوودانی رایگەیاند عێراق بە گرنگییەوە دەڕوانێتە رۆڵی نێردەی راوێژکاریی ناتۆ لە عێراق و هاوکاریی لە بواری راهێنان و پلاندانان و ئاڵوگۆڕی ئەزموونەکاندا.
هەروەها سوودانی ئاماژەی بە بەرنامەی پیشەسازیی جەنگیی خوازراو کرد کە حکومەت پشتیوانی لێدەکات، جەختیشی لە خواستی عێراق بۆ هاوکاریکردن لەگەڵ ناتۆ لە بواری پیشەسازییە سەربازییەکاندا کردەوە، بەتایبەتی کەرەستە بەرگرییەکان، کە بەشداری دەکەن لە بەهێزکردنی ئاسایش و رێگرتن لە هەر دەستدرێژییەکی چاوەڕوانکراو.
لە لای خۆیەوە، سکرتێری گشتیی ناتۆ ستایشی هەنگاوەکانی عێراقی کرد و بانگهێشتنامەیەکی فەرمی دایە سوودانی، بۆ بەشداریکردن لە کۆبوونەوەی کە بەم نزیکانە لە بڕۆکسل بەڕێوەدەچێت و لەوێ گوتارێک پێشکێش بکات.
مارک رووتە، ستایشی هەوڵەکانی حکومەتی کرد لە گەشەپێدانی ئاسایشی و دۆخی سەقامگیری و گەشەکردنی وڵاتدا، جەختی لەوە کردەوە کە ناتۆ رژدە لەسەر بەهێزکردنی پەیوەندییەکان لەگەڵ عێراق و پتەوکردنی هاوکارییە بەرهەمدارەکان، بەتایبەتی لە بواری پیشەسازییە سەربازییەکاندا.
شەوی رابردووش محەممەد جەواد زەریف، جێگری سەرۆککۆماری ئێران بۆ کاروباری ستراتیژی تاران گەیشتە بەغدا و بڕیارە ئەمڕۆ لەگەڵ محەممەد شیاع سوودانی، سەرۆکوەزیرانی عێراق و مەحممود مەشهەدانی، سەرۆکی پەرلەمان و چەند سەرکردەیەکی سیاسی لە عێراق کۆببێتەوە.
بە گوێرەی میدیاکانی ئێران محەممەد جەواد زەریف، بە ئامانجی بەشداریکردن لە سێیەمین کۆنفرانسی زانستی نێودەوڵەتی سەبارەت بە ئاسۆی داهاتووی شوێنکەوتوانی ئەهلی بەیت لە بەغدا ئامادە دەبێت.
ئەوە لە کاتێکدایە رۆژی سێشەممەی رابردوو، مەحموود مەشهەدانی، سەرۆکی پەرلەمانی عێراق لە تاران لەگەڵ بەرپرسانی باڵای ئێران کۆبووەوە.
ئەو سەردانەی زەریف بۆ بەغدا، دوای سەردانی محەممەد شیاع سوودانی، سەرۆکوەزیرانی عێراق دێت بۆ ئێران کە مانگی رابردوودا بوو لە دیدارەکانی لەگەڵ بەرپرسانی باڵای ئەو وڵاتە، باسیان لە پەرەپێدانی پەیوەندییەکانی نێوان هەردوو وڵات کرد، لەگەڵ پرسە ئەمنی و ئابوورییەکان.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ