وەزیری بەرگری و سوپاسالاری تورکیا گەیشتنە بەغدا

 

وەزارەتی بەرگریی تورکیا ئەمڕۆ (سێشەممە، 06-02-2024) رایگەیاند، یەشار گولەر، وەزیری بەرگری و مەتین گوراک، سوپاسالاری تورکیا، بە سەردانێک گەیشتنە بەغدای پایتەختی عێراق و زنجیرەیەک کۆبوونەوە دەکەن.

 

ئەم سەردانەی وەزیری بەرگری و سوپاسالاری تورکیا لەکاتێکدایە، ئۆپەراسیۆن و بۆردوومانەکانی تورکیا لە هەرێمی کوردستان بە بیانووی بوونی پەکەکە بەردەوامن.

 

هەڵکەوت عەزیز، پەیامنێری رووداو لە بەغدا رایگەیاند "بەپێی زانیارییەکانی ئێمە، وەزیری بەرگریی تورکیا لەگەڵ وەزیری بەرگریی عێراق کۆدەبێتەوە، دواتر لەگەڵ محەممەد شیاع سوودانی، سەرۆکوەزیرانی عێراق، پاشانیش لەگەڵ لەتیف رەشید، سەرۆککۆماری عێراق کۆدەبێتەوە، هەروەها بڕیارە دوانیوەڕۆی ئەمڕۆ شاندەکە بگاتە هەرێمی کوردستان و لەگەڵ بەرپرسانی باڵای هەرێمی کوردستان کۆببێتەوە."

 

هەر بەپێی زانیارییەکانی پەیامنێرەکەی رووداو لە بەغدا، بابەتی سەرەکیی گفتوگۆکانی شاندەکەی تورکیا لەگەڵ بەرپرسانی باڵای عێراق و  هەرێمی کوردستان، بابەتی پرسی سنوور و پرسی پارتی کرێکارانی کوردستان (پەکەکە)ـیە. هەریەک لە عێراق و هەرێمی کوردستانیش دەیانەوێت جەخت بکەنەوە لەوەی "لە هێرشەکانی تورکیا چەند جاریک خەڵکی مەدەنی بوونەتە قوربانی."

رۆژی 23ـی کانوونی دووەمی 2024، ئیبراهیم کاڵن، سەرۆکی دەزگای هەواڵگریی تورکیا سەردانی بەغدای کرد و لەگەڵ لەتیف رەشید، سەرۆککۆماری عێراق کۆبووەوە.

 

رۆژی 28ـی کانوونی دووەمی 2024، بارەگای بارزانی رایگەیاند، سەرۆک مەسعود بارزانی لە پیرمام پێشوازی لە ئیبراهیم کاڵن، سەرۆکی دەزگای هەواڵگریی تورکیا کرد. لە دیدارەکەدا، بەگوێرەی راگەیێندراوەکەی بارەگای بارزانی، بیروڕا لەبارەی بارودۆخی سیاسی و دواپێشهاتەکان لەسەر ئاستی ناوچەکە و پرسی هەڕەشەی تیرۆر ئاڵوگۆڕ کرا.

 

هەر لەو دیدارەدا "جەخت لەسەر پەیوەندییەکانی نێوان هەرێمی کوردستان و تورکیا و هەماهەنگییەکان بۆ پاراستنی ئارامی و سەقامگیری کرایەوە."