رووداو دیجیتاڵ
وەزارەتی تەندروستیی عێراق لینکی پێشکێشکردنی دامەزراندنی بۆ ئەو کەسانە کارا کرد کە بەشە پزیشکییەکانییان لە زانکۆکەکانی دەرەوەدا تەواو کردووە.
لینکەکە ماوەی 15 رۆژ کارا دەبێت و دامەزراندنەکەش دەرچووانی هەرێمی کوردستان و ناوچە کوردستانییەکانی دەرەوەی هەرێمی کوردستان دەگرێتەوە.
وەزارەتی تەندروستیی عێراق لە راگەیێندراوێکدا داوا لەو دەرچووانەی کۆلێژە پزیشکی و تەندروستییەکانی تەکنیکی، پەرستاری و پەیمانگەکانی تەکنیکی و پەرستاری دەکات کە یاسای پلەبەندیی پزیشکیی ژمارە شەشی ساڵی 2000 لە دەرچووانی ساڵانی 2022-2023 دەگرێتەوە و لە زانکۆکانی دەرەوە خوێندوویانە، زانیارییەکانیان لە رێگەی لینکێکەوە بۆ دامەزراندن بنێرن کە بۆ ئەو مەبەستە کراوەتەوە.
ماجید شنگالى، سەرۆکى لیژنەى تەندروستیى پەرلەمانى عێراق بە تۆڕى میدیایی رووداوى راگەیاند: "ئەو بڕیارى دامەزراندنە ئەو کەسانە دەگرێتەوە کە لە زانکۆکانی دەرەوەی عێراق خوێندوویانە."
ئەوانەی ئارەزووی دامەزراندنیان هەیە دەتوانن کلیک لێرە بکەن و زانیارییەکان بنێرن. لینکەکە بەپێی وەزارەتی تەندروستیی عێراق ماوەی 15 رۆژ کارا دەبێت.
د. روبا فەلاح، ئەندامی تیمی میدیایی وەزارەتی تەندروستیی عێراق بە تۆڕی میدیایی رووداوی راگەیاند: "ئەو کەسانەی دەرچووی ئەو کۆلیژ و بەشە پزیشکییانەن کە ئاماژەیان بۆ کراوە، دەتوانن لە هەرێمی کوردستان و هەموو عێراق فۆرمەکە پڕ بکەنەوە."
ماجید شنگالى دەڵێت: "هەر دەرچوویەکى ئەو زانکۆیانەى دەرەوەى عێراق کە هاونیشتیمانیى پارێزگاکانى هەرێمى کوردستان بێت، دەتوانێت داواکارى دامەزراندن پێشکێش بکات، بەو مەرجەى دۆسیەى لە وەزارەتى خوێندنى باڵا و توێژینەوەى زانستى عێراق هەبێت بۆ ئەو خوێندنە".
فۆرمەکەی وەزارەتی تەندروستی ژمارەیەک بەشی تێدایە. جگە لە ناوی چواریی کەسەکە، ژمارەی تۆمارکردنی پێشوەختە و پسپۆڕییەکەشی لێ داوا کراوە.
پێشتر لە یەکى ئایاردا وەزارەتى تەندروستیى عێراق دەرگاى پێشکێشکردنی بۆ دامەزراندنى دەرچووانى کۆلێژ و پەیمانگە تەندروستى و پزیشکییەکانى هەرێمى کوردستان کردەوە کە بۆ ساڵى خوێندنى 2022–2023 کە 15 مانگ کۆتایی دێت.
دامەزراندنەکە ئەو کەسانە دەگرێتەوە کە دانیشتووى کەرکووک و پارێزگاکانى عێراقن و لەو زانکۆیانە خوێندنیان تەواو کردووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ