سوودانی: بەرەنگاربوونەوەی گەندەڵیمان کردووەتە بنەمای پەیوەندیی باش لەگەڵ وڵاتان

 

ئەمڕۆ شەممە، 4ـی تشرینی دووەمی 2023، محەممەد شیاع سوودانی، سەرۆکوەزیرانی عێراق لە حەوتەمین کۆنفرانسی باڵیۆزان و نێردە دیپلۆماسییەکانی عێراق لە بەغدا گوتارێکی پێشکێشکرد و رایگەیاند، "بەرەنگاربوونەوەی گەندەڵیمان کردووەتە بنەمایەکی پەیوەندییەکانمان لەگەڵ وڵاتانی دیکە. چۆن پەیوەندییەکی هاوسەنگ، بەهێز و پەرەسەندوو دروست دەبێت، ئەگەر لایەنی دیکە دز و گەندەڵەکان بپارێزێت، وڵاتینامەیان پێ بدات و پارە دزراوەکەیان بۆ بشارێتەوە و دواتر رەوایی بە پارەکە بدات؟ لە کاتێکدا ئەو پارەیە لە گەلی عێراق دزراوە."

 

سەرۆکوەزیرانی عێراق راشیگەیاند، "بەرژەوەندیی هاووڵاتیانمان، بەرژەوەندییە باڵاکانمان، سەروەریی و پاراستنی پێگەی عێراق لەسەرووی هەموو بنەماکانەوەیە. ئەم گوتارەمان لە زۆربەی بۆنەکان و پەیامەکانمان بۆ جیهان دووپاتکردوەتەوە. بەرژەوەندی ئێمە و ئەوان، دوور لە جەمسەرگیری و لەسەر بنەمای دەستوەرنەدانی دوولایەنەیە بۆ کاروباری نێوخۆی یەکدی."

 

سوودنی گوتی، "زۆرجار گوێمان لەوە بووە کە سیاسەت بنەمای چەسپاو و جێگیری نییە، بەڵام سیاسەتی دەرەوەی عێراق چەندین بنەمای چەسپاو و جێگیری هەیە کە سەرباری هەموو دۆخەکان ناگۆڕدرێن. ئەم بابەتەش لە مامەڵەکردنمان لەگەڵ پرسە ناوچەیی و هەرێمییەکاندا بەرجەستەکردووە و لەپێش هەموویان دۆزی فەلەستین دێت کە بەهێزترین هەڵوێستمان لەبارەی پیشانداوە. هەڵوێستی ئێمە زۆر لە هەڵوێستێکی سیاسی بەهێزترە، چونکە ئەمە بەشێکە لە ویژدان، کولتوور و مێژوو و گرێدراوی بواری کۆمەڵایەتی و ئایینی گەلی عێراقە."

 

محەممەد شیاع سوودانی لەبارەی دۆخی غەززەوە گوتی، "هەڵوێستی فەرمیمان لە یەکەم رۆژی جەنگی دوژمنکارانەی دژی گەلی فەلەستین بە روونی ئاشکراکرد و لە لووتکەی قاهیرەدا خستمانەڕوو. پێمان وایە دەبێ دەستبەجێ ئەم هێرشە دوژمنکارانەیە کۆتایی بێت بۆ ئەوەی بازنەی جەنگەکە فراوان نەبێت و پەرەنەسەنێت. هەروەها کردنەوەی دەروازەی مرۆیی بۆ گەیاندنی هاوکارییەکان و رزگارکردنی خەڵکی غەززە پێویستە. هەر لەم روانگەیەشەوە داوای دامەزراندنی سندووقی کۆمەککردن و ئاوەدانکردنەوەی ‌غەززەمان کرد، چونکە پێمان وایە ئەوەی لە غەززە روودەدات تاقیکردنەوەیەکی ئەخلاقی و مرۆییە". 

 

لەبارەی پەیوەندییەکان لەگەڵ وڵاتانی دراوسێ، سەرۆکوەزیرانی عێراق رایگەیاند، "دەکرێ هەموو ناکۆکییەکانمان لەگەڵ وڵاتانی دراوسێ لە رێگەی دیالۆگ و گفتوگۆ چارەسەر بکەین بۆ ئەوەی بتوانین بەسەر کێشەکاندا زاڵ بین و دەرفەتی نوێ بخرێنەگەڕ بۆ کرانەوەی زیاتری نێوان گەلانی وڵاتانی دراوسێ. لەگەڵ وڵاتانی دراوسێ لەسەر بنەمای رێزگرتن لە سەروەری و پاراستنی سەلامەتی و یەکپارچەیی خاک مامەڵە دەکەین."