چوار تەقینەوە لە بەغدا روویاندا؛ کوژراو و بریندار هەن
رووداو - بەغدا
پەیامنێری رووداو رایگەیاند، چوار تەقینەوە لە شاری بەغدا روویانداوە، کوژرا و بریندار هەن.
ئێوارەی ئەمڕۆ بۆمبێکی چێندراو لە گۆڕەپانی عەدەن لە باکووری شاری بەغدا تەقییەوە، بەو هۆیەوە دوو کەس کوژران و چوار کەسی دیکەش برینداربوون.
هەر ئێوارەی ئەمڕۆ لە ناوچەی شوعلە لە باکووری رۆژئاوای بەغدا لەنێو پاسێکی جۆری کیا بۆمبێک تەقییەوە، لە ئەنجامدا هاووڵاتییەک کوژرا و دوو کەسی دیکەش برینداربوون.
تەقینەوەی سێیەم لە ناوچەی حەبیبییە لە رۆژهەڵاتی بەغدا بووە، کە بۆمبێک لەنێو پاسێکدا تەقیوەتەوە و لە ئەنجامدا پێنج کەس برینداربوون.
هەروەها بۆمبێکی دیکەش لە ناوچەیەکی بازرگانی لە گەڕەکی توراس لە باشووری بەغدا تەقیوەتەوە و بەهۆیەوە سێ کەس برینداربوون.