سەکۆی ئەلیکترۆنى دژی 'بابەتی ئابڕووبەر' لە عێراق کارا کرا

 

3ـی تەممووزى 2024، وەزارەتى ناوخۆى عێراق لە راگەیێندراوێکدا ئەو سەکۆ ئەلیکترۆنییەى بە ناوى"بگەیێنە" کارا کردووە.

 

وەزارەتى ناوخۆ دەڵێت "ئەو سەکۆیە بۆ هەواڵدانە لەو بەرهەمانەى ئاستیان نزمە و زیان بە حەزى گشتى دەگەیێنن، پەیامى نەرێنیی بێشەرمانەیان تێدایە و سەقامگیریى کۆمەڵگە تێکدەدەن."

 

سەگڤان سندى، جێگرى سەرۆکى لیژنەى ئاسایش و بەرگریی پەرلەمانى عێراق بە تۆڕى میدیایی رووداوى راگەیاند "وەزارەتى ناوخۆ، لێکۆڵینەوە لەو جۆرە بابەتانە دەکات و ئەو هەژمارە ئەلیکترۆنییانە دادەخات کە ئەو جۆرە بەرهەمانە بڵاودەکەنەوە، هەندێکجاریش لە دادگە رێوشوێنى یاسایی لەدژیان دەگرێتەبەر."

 

 لە جۆرەکانى هەواڵدان لەو سەکۆ ئەلیکترۆنییەدا، هاندانى رقلێبوونەوە و تووندووتیژین، لەگەڵ ئەو بەرهەمانەى دژی حەزى گشتین.   

     

سەگڤان سندى ئاماژەى بەوە دا ئەو بەرهەمە ڤیدیۆییانە کێشەى کۆمەڵایەتیان لێکەوتووەتەوە، بۆیە رێوشوێن لە دژیان گیراوەتەبەر.

 

لەو سەکۆیەدا پێویستە هەواڵدەرەکە ناوى سکاڵالێکراوەکە و شوێنى کار و نیشتەجێبوونەکەى، هەروەها بەستەرى ئەو بەرهەمە بنێرێت، کە بە "ئاستنزم" دادەنرێت.