چوارچێوەی هاوئاهەنگی بڕیار لەبارەی پڕۆژەیاسای بودجە دەدات؛ بژارەی زۆرینە ئەگەرێکی بەردەمیانە

 

 

د. عەلی دیفاعی، گوتەبێژی ئەنجوومەنی باڵای ئیسلامی دەڵێت، "بڕوام وایە ھەنگاوی باشمان بڕیوە و نزیکین لە رێککەوتن و زۆریش لێکنزیکین؛ ئەو دوو رۆژەی ھەفتەی رابردووش کە مۆڵەتدرا بۆ رێککەوتن بوو، بۆیە دەڵێم نزیکین رێکبکەوین، بەڵام لە ئەنجامدا ئەمە بەرپرسیارێتیی نیشتمانییە و نابێت لەوە زیاتر درەنگبکەوین. نیوەی ساڵ تێپەڕی و بودجە پەسند نەکراوە، لیژنەی دارایی ئامادەی کردووە بۆیە لە کۆبونەوەکە بڕیار دەدەین کە پێویستە بودجە پەسند بکرێت لەبەر بەرژەوەندیی گشتی."

 

هێشتا گۆڕانکارییەکانی سەر مادەکانی 13 و 14، کە تایبەتن بە پشکی هەرێمی کوردستان، نەکراون؛ کە کورد داوای دەکات وەکو ئەوەی لە حکومەت هاتووە دەبێت تێپەڕێندرێت. سەرۆکی فراکسیۆنی پارتی بژارەی زۆرینە و کەمینە رەتدەکاتەوە و دەڵێت، بە هیچ شێوەیەک دەستبەرداری مافەکانی هەرێمی کوردستان نابن.

 

د. ڤیان سەبری، سەرۆکی فراکسیۆنی پارتی لە پەرلەمانی عێراق دەڵێت، "لە راستیدا ئەگەر باسی لۆژیکی زۆرینە و کەمینە بکەن، ئێمە وەکو کورد 19 ساڵە لە پەرلەمانین و ھیچکات یاسایەک لە بەرژەوەندیی کورد تێناپەڕێت وەکو ئەوەی کە ئێمە و بۆچوونەکانمان دەیەوێت، بۆیە کە چوارچێوەی ھاوئاھەنگی باسی لۆژیکی زۆرینە دەکات، ئێمەش قسەی خۆمان دەبێت و دەڵێین، ھیچ کات دەستبەرداری ماف و شایستە داراییەکانی حکومەت و خەڵکی ھەرێمی کوردستان نابین."

 

پەرلەمانى عێراق لە 16ى نیسانى 2023 خوێندنەوەى دووەمى بۆ پڕۆژەیاساى بودجەى گشتى کرد، کە هەنگاوى بەر لە دەنگدان و پەسندکردنیەتى؛ ئەگەرچی لیژنەی دارایی زۆربەی کارەکانی بودجەی تەواو کردووە، بەڵام نەبوونی کۆدەنگی وایکردووە پەرلەمان نەتوانێت بۆ پەسندکردنی بودجەی گشتی کۆببێتەوە.

 

لایەنە عێراقییەکان ئۆباڵی درەنگکەوتنی بودجە دەخەنە ئەستۆی کورد و زۆربەی پەرلەمانتارانی کوردیش ئەوە رەتدەکەنەوە و دەڵێن، پشکی ھەرێمی کوردستان گرفتی بەردەم تێپەڕاندنی بودجە نییە، چونکە زۆرینەی پەرلەمان بەدەست شیعە و چوارچێوەی ھاوئاھەنگییە و ئەوان دەتوانن بە زۆرینە تێیپەڕێنن، بەڵام نەبوونی رێککەوتنی سیاسی لەنێوان فراکسیۆنە سیاسییەکان وایکردووە تائێستا بودجە پەسند نەکرێت.