یەکەم فڕۆکە لە فڕۆکەخانەى موسڵ دەنیشێتەوە

 

رۆژی 4ى نیسانى 2023، ئەمین فەنەش، قایمقامى موسڵ بە تۆڕى میدیایی رووداوى راگەیاند: "ئێوارەى ئەمڕۆ یەکەم فڕۆکە بەشێوەی ئەزموونی لە فڕۆکەخانەى  موسڵ دەنیشێتەوە و پارێزگارى شارەکەش ئامادەی بۆنەکە دەبێت." 

 

ئەمین فەنەش گوتیشى: "رۆژی 3ى نیشان لەڕێگەى فڕۆکەیەکى بچووکەوە پرۆسەى نیشتنەوەکە تاقیکرایەوە و راپۆرت دراوە لەبارەى ئەوەى کە فڕگەى فڕۆکەخانەکە شیاوە بۆ نیشتنەوەى فڕۆکەکەى ئەمڕۆ کە لە جۆرى (C130) دەبێت." 

 

رۆژی 10ى ئابى 2022، مستەفا کازمى، سەرۆکوەزیرانى ئەو کاتى عێراق بەردى بناخەى نۆژەن و ئامادەکردنەوەى فڕۆکەخانەى نێودەوڵەتیى موسڵى دانا، کە لە پرۆژەیاسای بودجەى 2021 بڕیارى نۆژەنکردنەوە و ئامادەکردنى درا و لەلایەن دوو کۆمپانیاى فەرەنسی و سعودیەوە جێبەجێ دەکرێت. 

 

قایمقامى موسڵ گوتی: "کۆمپانیاى جێبەجێکارى فڕۆکەخانە بەڵێنیداوە، تاوەکو ساڵێکى دیکە فڕۆکەخانەکە تەواو بکات."

 

بودجەى ئەو پڕۆژەیە 200 ملیار دینارە و نیوەى لە پارەى بلۆککراوى پێشووى پارێزگاى نەینەوایە لە سەردەمى شەڕى داعش و نیوەکەى دیکەى لە بودجەى یاسای پاڵپشتیى خێراى ئاسایشى خۆراک و پەرەپێدان دابین دەکرێت.

 

فڕۆکەخانەى نێودەوڵەتیى موسڵ لە ساڵى 1920 دەست بە بنیاتنانی کراوە و رووبەرەکەى 1600 دۆنمە.