رووداو دیجیتاڵ
ئەنجوومەنی وەزیرانی عێراق بڕیاریدا 12 تانکی بۆ پاڵاوگەی کەسکێ دروست بکرێن.
ئەنجوومەنی وەزیرانی عێراق، رۆژی سێشەممە 4ـی شوباتی 2025، بە سەرۆکایەتیی محەممەد شیاع سوودانی کۆبوونەوەی ئاسایی خۆی کرد و چەند بڕیارێکی دا.
بەگوێرەی راگەیێندراوی نووسینگەی سەرۆکوەزیرانی عێراق، بڕیاردرا بە دروستکردنی 12 تانکی بۆ پاڵاوگەی کەسکێ لە پارێزگای نەینەوا؛ هەروەها ئەنجوومەنی وەزیرانی عێراق رەزامەندی دەربڕی لە رێنماییەکانی ئاسانکاری جێبەجێکردنی یاسای بودجەی گشتیی فیدراڵی ژمارە 13ی ساڵی 2023 هەڵاوێردن بۆ ئەو پڕۆژەیە بکرێت؛ هەروەها دەسەڵاتی جێگری سەرۆکوەزیران و وەزیری نەوت زیادکرا بۆ خەرجکردنی 500 ملیۆن دینار بۆ پڕۆژەکە.
هەروەها بڕیاردرا پڕۆژەی دروستکردنی وێستگەی چارەسەرکردنی خاشاک و بەرهەمهێنانی وزەی کارەبا لە ناوچەی نەهرەوان لە پارێزگای بەغدا بدرێتە کۆمپانیای Shanghai SUS Environment، بە مەرجی ئەوەی پڕۆژەکە بە دوو ساڵ تەواو بکرێت و بۆ 25 ساڵ وەبەرهێنانی تێدا بکرێت.
هەر لە کۆبوونەوەکەدا گرێبەستی دەسەڵاتی فڕۆکەوانیی شارستانی لەگەڵ رێکخراوی فڕۆکەوانیی شارستانیی نێودەوڵەتی (ئایکاو - ICAO) بە مەبەستی بەدەستهێنانی مۆڵەتی نێودەوڵەتی بۆ پەیمانگای فڕۆکەوانی شارستانی و جێبەجێکردنی بەرنامەی راهێنان بۆ ستافی دەسەڵاتی فڕۆکەوانی شارستانی پەسندکرا.
لە چوارچێوەی بەدواداچوون بۆ پڕۆژەکانی دروستکردنی کۆمەڵگەکان، ئەنجوومەنی وەزیرانی عێراق بڕیاریدا حەرەمی شوێنەواری لەناو زەویی پڕۆژەی ناوچەی سەدری نوێ تاپۆ بکرێت.
بڕیاریش درا پڕۆژەی ئاوەڕۆی گەورەی حیلە بە چاودێری پارێزگای بابل بەڕێوەبچێت و وەزارەتی ئاوەدانکردنەوە و نیشتەجێبوون لە پڕۆژەکەدا بکشێتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ