سەنتەری ستراتیژیی مافەکانی مرۆڤ لە عێراق: ساڵی رابردوو 7 هەزار رووداوی هاتووچۆ روویانداوە

 

رۆژی چوارشەممە، 03-01-2024، فازڵ غەڕاوی، سەرۆکی سەنتەری ستراتیژیی مافەکانی مرۆڤ، راگەیێندراوێکی لەبارەی رووداوەکانی هاتووچۆ لە عێراق بڵاوکردەوە و رایگەیاند، "لە79.2٪ـی رووداوەکان خودی شۆفێرەکان بوون، 8.1٪ـی هۆکارەکانیش بەهۆی ئۆتۆمبێلەکان و 6.2٪ بەهۆی رێگەکانە و 6.5٪یش هۆکاری دیکە بووە."

 

فازڵ غەڕاوی پێیوایە زۆربوونی رووداوەکانی هاتووچۆ دەگەڕێتەوە "بۆ کۆنیی رێگە و شەقامەکان بەهۆی نۆژەننەکردنەوەیان و نەبوونی هێماکانی هاتووچۆ و نەبوونی کەرەستە و پێویستییەکانی سەلامەتی و شورای ئەمنی و کامێراکان، جگە لە پابەندنەبوونی شۆفێران بە سیستمی هاتووچۆ و رێساکانی رۆیشتن، سەرباری خێرایی زۆر  تێپەڕاندنی رێڕەوی خۆیان، لەگەڵ پابەندنەبوون بە هێماکانی هاتووچۆ."

 

هەروەها بە گرنگی دەزانێت کە عێراق رێگە خێراکانی زیاد بکات و قیرتاوکردنی شەقامە کۆنەکانی دەستپێبکاتەوە، دەشڵێت، " رێگە خێراکانی نێوان شارەکان لە هەموو رێگەکانی دیکە پێویستترن."

 

بەپێی ئاماری سەنتەرەکە، ساڵی 2021 لە عێراق هەشت هەزار و 286 رووداوی هاتووچۆ روویانداوە و بەهۆیانەوە دوو هەزار و 152 کەس گیانیانلەدەستداوە، لەساڵی 2022دا 11 هەزار و 523 رووداو روویانداوە و سێ هەزار و 79 کەس بەهۆیانەوە گیانیانلەدەستداوە و هەشت هەزار و 444 کەسیش برینداربوون."

 

رۆژی یەکشەممە، 31-12-2023، عەمید میقداد میری، گوتەبێژی وەزارەتی ناوخۆی عێراق لە کۆنفرانسێکی رۆژنامەڤانیدا، لەبارەی سەرپێچییەکانی تایبەت بە رووداوەکانی هاتووچۆ، رایگەیاند، لە ساڵی 2023ـدا سێ ملیۆن و 500 هەزار سەرپێچیی هاتووچۆ تۆمارکراون، بەو پێیە رۆژانە دەکاتە نۆ هەزار و 589 سەرپێچی، واتە هەر کاژێرێک 399 سەرپێچیی هاتووچۆ کراون و هەر خولەکێک حەوت سەرپێچی روودەدات.