رووداو دیجیتاڵ
سەرۆکوەزیرانی عێراق لەبارەی کۆمەڵکوژیی کوردانی ئێزدی پەیامێکی بڵاوکردەوە و دەڵێت، کوردانی ئێزدی "رووبەڕووی پێشێلکردنێکی زەق و مامەڵەیەکی دڕندانەی چەتەکانی داعشی تیرۆریست بوونەوە."
رۆژی شەممە 03-08-2024 محەممەد شیاع سوودانی، سەرۆکوەزیرانی عێراق لە هەژماری خۆی لە تۆڕی کۆمەڵایەتیی ئێکس نووسی، "لە رۆژێکی وەکو ئەمڕۆدا لە 3ی ئاب، خەڵکی ئێزدیمان لەگەڵ پێکهاتەکانی دیکە دووچاری پێشلکردنێکی زەق و مامەڵەیەکی دڕندانەی چەتەکانی داعشی تیرۆریست بوونەوە."
لە 03-08-2014دا چەکدارانی داعش هێرشیان کردە سەر شنگال و دەوروبەری. لەو هێرشەدا 11 هەزار و 417 کوردی ئێزدی رفێندران، کۆمەڵکوژ و بێسەروشوێن کران.
سەرۆکوەزیرانی عێراق دەڵێت، "حکومەتەکەمان بەردەوامە لە کارکردن بۆ دەستەبەرکردنی مافی هەموو پێکهاتەکان."
سوودانی ئاماژە بەوەش دەکات، "بەدواداچوونی ورد و بەردەوام دەکەین بۆ جێبەجێکردنی یاساکان، ئەوەش لەپێناوی بەدیهێنانی مافی قوربانیان و ئاوەدانکردنەوەی ناوچەکانیان و بە مەبەستی گەڕانەوەی سەرجەم ئاوارەکان. تاوەکو ئێستا هێزەکانمان بەردەوامن لە راوەدونانی پاشماوەی تیرۆریستان و دڵنیاتان دەکەینەوە کە دەربازیان نابێت."
ئەمڕۆ زانکۆی کوردستان بە هاوئاهەنگی لەگەڵ نووسینگەی رزگارکردنی رفێندراوانی ئێزدی، یادی 10 ساڵەی کۆمەڵکوژیی کوردانی ئێزدی دەکاتەوە و نێچیرڤان بارزانی، سەرۆکی هەرێمی کوردستان لە رێورەسمەکەدا بەشداری دەکات.
حوسێن قائیدی، بەرپرسی نووسینگەی رزگارکردنی رفێندراوانی دەستی داعش بە تۆڕی میدیایی رووداوی گوت، "بەهۆی هێرشەکانی داعشەوە بۆسەر شنگال و دەوروبەری، نزیکەی 5000 ئێزدی کۆمەڵکوژ کران؛ هەروەها 6417 کەسیش رفێندران."
بەگوێرەی ئاماری نووسینگەی رزگارکردنی رفێندراوانی دەستی داعش، لەو کوردە ئێزدییانەی رفێندران، تاوەکو ئەمڕۆ 3576 کەسیان رزگارکراون و 2841 کەسیان بێسەروشوێنن.
لە کۆی 119 گۆڕی بەکۆمەڵی دۆزراوە لە سنووری شنگال، تەنیا 50یان هەڵدراونەتەوە. سعود مستۆ، بەڕێوەبەری گشتیی کاروباری ئێزدییان لە وەزارەتی ئەوقاف و کاروباری ئایینیی هەرێمی کوردستان بە رووداوی گوت، "لەو 50 گۆڕەی هەڵدراونەتەوە 600 رووفات هەبوون و لەو ژمارەیەش 264 رووفات گەڕێندراونەتەوە و رووفاتی ئەوانی دیکە لە بەغدان و هێشتا پڕۆسەی پشکنینی DNAیان تەواو نەبووە."
لە هەرێمی کوردستان بەشێکی زۆری کوردانی ئێزدی ئاوارە لە 21 کەمپ نیشتەجێن. حوسێن قائیدی دەڵێت، "25٪ بۆ 30%ـی کوردانی ئێزدی ئاوارە لە کەمپەکانەوە گەڕاونەتەوە شنگال و دەوروبەری. ئەوانەیان ماونەتەوە لە 19 کەمپدا جێگیر کراون."
دوو هەزار و 841 کوردی ئێزدی رفێندراو تاوەکو ئێستا چارەنووسیان دیار نییە.
حوسێن قائیدی دەڵێت، پێشبینی دەکەن زۆرینەیان لە سووریا و رۆژئاوای کوردستان بن، هەروەها بەشێکی دیکەیان لەو ناوچانەی عێراق بن کە داعش لە رابردوودا تێیاندا باڵادەست بوو.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ