سەرۆکی ئەنجوومەنی پارێزگای نەینەوا: گۆڕینی قایمقام و بەڕێوەبەری ناحیەکان جێبەجێدەکرێت

 

لە نوێترین پێشهاتی کۆبوونە جێ مشتومڕەکەی رۆژی سێشەممە، 2ـی ئەم مانگەی ئەنجوومەنی پارێزگای نەینەوا، کە 20 قایمقام و بەڕێوەبەری ناحیەی تێدا هەڵبژێردران و بەرپرسانی پێشوو لەسەر کارەکانیان دوورخرانەوە. ئەحمەد حاسوود، سەرۆکی ئەنجوومەنی پارێزگا کە سەر بە هاوپەیمانیی عەقدی نیشتمانیی فالح فەیاز، سەرۆکی دەستەی حەشدی شەعبییە، وەڵامی نووسراوێکی دەستەی هاوئاهەنگیی نێوان پارێزگاکانی سەر بە ئەنجوومەنی وەزیرانی عێراقی دایەوە.

 

حاسوود دەڵێت "لە دانیشتنی رۆژی 2ـی ئەم مانگە، ئەنجوومەنی پارێزگا تایبەتمەندییە دەستووری و یاساییەکانی جێبەجێکردووە لەپێناو چاکسازی کارگێڕیی تایبەت بە هەڵبژاردنی سەرۆکی یەکە کارگێڕییەکان، کە بەپێی دەستوور بووە."

 

مادەی 115ـی دەستووریشی بە بەڵگە بۆ قسەکانی هێناوەتەوە، کە باسی ئەوە دەکات هەر شتێک لەو دەسەڵاتانەی تایبەتن بە دەسەڵاتە فیدراڵییەکانەوە باسنەکرابێت، لە پێشتریێتی بۆ یاسای هەرێم و پارێزگاکانی ناڕێکخراو لە هەرێمدا دەبێت، ئەگەر ناکۆکی کەوتە نێوان ناوەند و دەسەڵاتەکانی ناوەندەوە.

 

جگە لەوەش ئاماژەی بۆ مادەی 30ـی یاسای پارێزگا ناڕێکخراوەکان لە هەرێمێکدا کردووە و دەڵێت "کاری سەرۆکی یەکەکانی کارگێڕی بە کۆتایی هەر خوولێکی هەڵبژاردن کۆتایی دێت و، ئەنجوومەنی نوێ دووبارە هەڵیاندەبژێرێتەوە." 

 

لە راگەیێندراوەکەیدا، ئەحمەد حاسوود کە هاوپەیمانیێتییەکەی لە هەڵبژاردنی ئەنجوومەنی پارێزگاکانی عێراق سێ کورسیی ئەنجوومەنی پارێزگای نەینەوای بەدەستهێناوە، دەڵێت "جەخت لەوە دەکەینەوە ئەنجوومەنی پارێزگا بەردەوامە لە رێکارەکانی چاکسازی، چونکە ئیرادەی راستەقینەی خەڵکی نەینەوا و نوێنەری رەوای ئەوانە."

 

حاسود دەشڵێت "سەرکۆنەی سەرجەم ئەو لێدوانانە دەکەین کە سووکایەتی بە ئەنجوومەن و دەستەی سەرۆکایەتی دەکات و بە مافی یاسایی خۆی دەزانێت ئەو کەسانە بداتە دادگە کە سووکایەتی دەکەن."

 

سەبارەت بەو لایەنانەی هەڵوێستیان وەرگرتووە، دەڵێت "ئەو کەسەی زیانی پێدەگات، دەتوانێت پەنا بباتە بەر دادگەی تایبەتمەند."

 

ئەمڕۆ (چوارشەممە) دەستەی باڵای هاوئاهەنگیی نێوان پارێزگاکان لەبارەی گۆڕانکارییەکانی یەکە کارگێڕییەکان لەلایەن ئەنجوومەنی پارێزگای نەینەواوە دەڵێت، "پەلە نەکەن". جگە لەوەی ئاماژەی بۆ ئەوەکرد، یاسا رێگە بە بڕیاردانی دەستپێلکارکێشانەوەی بەکۆمەڵ نادات. سەرزەنشتی ئەنجوومەنەکەشی تێدابوو بەوەی پێش رای ئەنجوومەنی دەوڵەت، پەلەیان لە بڕیاردن کردووە.

 

کۆبوونەوەی سێشەممەی ئەنجوومەنی پارێزگا نیگەرانیی لەلای فراکسیۆنی نەینەوای یەکگرتوو کە 13 ئەندامی هەیە، لێکەوتەوە و بەشێکیان ئەندامیێتی خۆیان لە ئەنجوومەنەکە هەڵپەسارد.