والییەکی داعش بە هاوکاری ئاسایشی هەرێمی کوردستان دەستگیرکرا

 

 

لیوا یەحیا رەسوول، گوتەبێژی فەرماندەی گشتیی هێزە چەکدارەکانی عێراق، ئەمڕۆ دووشەممە، لە هەژماری خۆیدا لە تویتەر رایگەیاند: "ئاژانسی هەواڵگری بە هاوئاهەنگی لەگەڵ ئاسایشی هەرێم والیی بەناو فەللوجەی دەستگیرکرد".

 

هاوکات ئاژانسی هەواڵگری و لێکۆڵینەوەی فیدڕاڵی لە وەزارەتی ناوخۆی عێراق، لە راگەیێندراوێکدا رایگەیاند: "تیمەکانمان تیرۆریستی ناوبراو (ئەبو عەلی جومەیلی)یان دەستگیرکرد، کە بەناو والیی فەللوجەیە و بەپێی ماددەی 4ـی یاسای بەرەنگاربوونەوەی تیرۆر داواکراوە، چونکە ئەندامی داعشی تیرۆریستە.

 

بەپێی راگەیێندراوەکەی ئاژانسی هەواڵگری ئەو کەسە لە لێکۆڵینەوە سەرەتاییەکاندا دانی بەوەدانا، کە "لە ساڵی 2005 ئەندامی رێکخراوی قاعیدە بووە و لە مۆڵگە تایبەتەکان کاری کردووە بۆ داڵدەدانی ئەو تیرۆریستانەی کە لە وڵاتانی عەرەبییەوە هاتوونەتە عێراق".

 

ئاژانسی هەواڵگری راشیگەیاند: "تیرۆریستی بەناو والی فەللوجە پێشتر بە 15 ساڵ زیندانی سزادرابوو، دواتر لە ساڵی 2011 ئازادکرا، بەڵام دیسان بەیعەتی دایە چەتەکانی داعش و لە مۆڵگەکانی چەکدا کاری کرد، پاش ئۆپەراسیۆنی رزگارکردنی ئەنباریش بەرەو سووریا هەڵات، کەچی دیسان گەڕایەوە و کرا بە جێگری والی موسڵ، دواتر کرا بەناو والیی فەللوجە و پشتێنەی بۆمبڕێژکراوی بەخۆیەوە بەستبوو، لە لێکۆڵینەوەکانیشدا دانی بەوەدانا کە دەیان کردەوەی تیرۆریستی دژی هێزە ئەمنییەکان و هاووڵاتیانی بێتاوان کردووە".

 

ئەم پێشهاتە دوای چەند کاژێرێک هات لە کۆبوونەوەیەکی ئەمنیی فراوان کە شەوی رابردوو لە بەغدا بە سەرپەرشتی مستەفا کازمی، فەرماندەی گشتیی هێزە چەکدارەکانی عێراق، لەگەڵ وەزیرانی بەرگری و ناوخۆی عێراق و بەشداری جەبار یاوەر، ئەمینداری گشتیی وەزارەتی پێشمەرگە و فەریق جەمال ئیمنکی، سەرۆکی ئەرکانی پێشمەرگە کرا.

 

سەبارەت بە لێکەوتەکانی کۆبوونەوەکە، جەبار یاوەر، ئەمینداری گشتیی وەزارەتی پێشمەرگە، رایگەیاند: لە کۆبوونەوەکەدا بڕیاردرا هەماهەنگی و کاری لیژنە هاوبەشەکانی نێوان سوپا و پێشمەرگە لە ناوەندەکانی نێوانیاندا چالاک بکرێن، بۆ پڕکردنەوە بۆشاییەکان و ئاڵوگۆڕکردنی زانیاری هەواڵگری و زیادکردنی ئۆپەراسیۆنە هاوبەشەکان بۆ رێگریکردن لە دووبارەبوونەوەی هێرشی چەکدارانی داعش لەو ناوچانە، وەک ئەوەی لە چەند رۆژی رابردوو روویدا و چەند پێشمەرگەیەک و چەند ئەفسەرێکی سوپای عێراق بوونە قوربانی.