عێراق
کۆبوونەوەی عەلی سیستانی، مەرجەعی باڵای شیعەکان لەگەڵ ژمارەیەک لە زانایانی ئایینیی شیعەکانی ئەفغانستان
رووداو دیجیتاڵ
عەلی سیستانی، مەرجەعی باڵای شیعەکان رایگەیاند، خەڵکی ئەفغانستان لە چەند دەیەی رابردوودا رووبەڕووی چەندین نەهامەتی بوونەتەوە؛ دەشڵێت، نابێت موسڵمانان و کۆمەڵگەی نێودەوڵەتی گەلی ئەفغانستان بەتەنیا جێبهێڵن.
دوای نیوەڕۆی رۆژی سێشەممە 3-1-2023، عەلی سیستانی، مەرجەعی باڵای شیعەکان لەگەڵ ژمارەیەک لە زانایانی ئایینیی شیعەکانی ئەفغانستان کۆبووەوە کە وەکو ئەنجوومەنی زانایانی شیعە سەردانی شاری نەجەفیان کردبوو و راپۆرتێکی تێروتەسەلیان لەبارەی دۆخی ئەو وڵاتە و ئەنجوومەنەکە پێشکێشکرد.
بەپێی راگەیێندراوی نووسینگەی عەلی سیستانی، مەرجەعی باڵای شیعەکان لە کۆبوونەوەکەدا نیگەرانیی زۆری خۆی بۆ ئەو نەهامەتیانە پیشانداوە کە بەدرێژایی چەند دەیەی رابردوو گەلی ئەفغانستان رووبەڕووی بووەتەوە و ئاماژەی بۆ "ئەو کارەساتانەش کردووە کە سەرجەم ئەفغانستان بەتایبەت ئافرەتانی بەدەستییانەوە ناڵاندوویانە"؛ جەختیشیکردووەتەوە: "پێویستە موسڵمانان و کۆمەڵگەی نێودەوڵەتی لەم کاتەدا گەلی ئەفغانستان بەتەنیا جێنەهێڵن و لە هیچ هەوڵێک بۆ سووککردنی ئازارەکانی سڵ نەکەنەوە."
عەلی سیستانی هەروەها ئاماژەی بۆ پێویستی پارێزگاریکردن لە یەکگرتوویی و هاوئاهەنگیی نیشتمانی و یەکڕیزی نێوخۆیی و رەچاوکردنی پێکەوەژیانی ئاشتییانەی نێوان سەرجەم پێکهاتەکانی ئەفغانستان کردووە و گوتوویەتی: "پێویستە لە تووندوتیژی لەگەڵ دەسەڵاتدارانی ئێستا خۆیان لابدەن. پێویستە ئەنجوومەنی زانایانی شیعە هەموو شتێک بکات لەپێناو دەستخستنی سەرجەم مافەکانی گەلی ئەفغانستان."
شیعەکان پێکهاتەیەکی ئەفغانستانن و چەندین جار تەقینەوە لەنێو مزگەوت و حوسەینییەکانیان کراونەتە ئامانج.
لە مانگی ئابی ساڵی 2021، رێکخراوی تاڵیبان، کابوولی کۆنترۆڵکردەوە. بەشی زۆری کۆمەڵگەی نێودەوڵەتیی پارەی ئەو وڵاتەیان بلۆککردووە و تاوەکو ئێستا دانیان بە حکومەتی نوێی ئەفغانستاندا نەناوە. ئەوەش وایکردووە رەوشی مرۆیی و ئابووریی ئەو وڵاتە رۆژ بە رۆژ خراپتر ببێت.
بەگوێرەی ئامارێکی نەتەوە یەکگرتووەکان نزیکەی 3.2 ملیۆن منداڵی خوار تەمەن پێنج ساڵان لە ئەفغانستان تووشی بەد خۆراکی بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ