رووداو- هەولێر
گرووپی داعش جارێكی دیكە سەربازگەی سپایكەری لە تكریت خوێناوی كردەوە و بە خۆكوژ و ژمارەیەك چەكدار هێرشێكی دیكەی بۆسەر سەربازگەكە ئەنجامدا.
بەپێی سەرچاوەیەكی تۆڕی میدیایی رووداو لە پارێزگای سەڵاحەدین، کاژێر 10:00 ی پێشنیوەڕۆی رۆژی یەکشەممە 3-1-2016، ژمارەیەک چەکداری نەناسراو هێرشیان کردووەتە سەر بەڕێوەبەرایەتیی پۆلیسی پارێزگای نەینەوا لە شاری تکریتی سەنتەری پارێزگای سەڵاحەدین، لەئەنجامدا دوو لە چەکدارەکان خۆیان تەقاندووەتەوە و بەڕێوەبەرایەتیی پۆلیسیان کردووەتە ئامانج.
بەپێی زانیارییەكانی تۆڕی میدیایی رووداو، چەکدارەكان سەر بە گرووپی داعش بوونە، هەروەها 8 کەس بوونە و دووان خۆیان تەقاندووەتەوە، شەش چەكدارەكەی دیکەش لەلایەن هێزەکانی پۆلیسەوە کوژراون و تەرمەکانیان کەوتوونەتە دەست هێزە ئەمنییەکان و ئێستا لێکۆڵینەوە لە ناسنامەیان دەکرێت.
بەهۆی هێرشکردنە سەر بەڕێوەبەرایەتیی پۆلیسی پارێزگای نەینەوا كە ئێستا بنكەی بەڕێوەبەرایەتییەكە لە سەربازگەی سپایکەرە، 8 ئەفسەر و پۆلیس کوژران و 11 پۆلیسی دیکەش بە سەختی بریندرابوونە، هێزە ئەمنییەکانیش ناوچەکەیان گەمارۆداوە و وەستان لەو شوێنە قەدەخەکراوە.
رۆژی 12ی حوزەیرانی 2014 ، لە ئەكادیمیای بنكەی سەربازی سپایكەر، 1700 سەربازی بەشداربووی خولێكی سەربازیی دوای ئەوەی مۆڵەتی پشوویان پێدرا و بەبێ چەك لە سەربازگەكەیان چوونە دەرەوە، بەشی هەرەزۆریان لەلایەن چەكدارانی داعش گیران و بەكۆمەڵ گوللەباران كران.
تەرمی هەندێك لەو سەربازانەش لەلایەن چەكدارانی داعش خرایە ناو رووباری دیجلە. بەپێی ئامری وەزارەتی مافی مرۆڤی عێراق، ژمارەی قوربانییەكانی گوشتارگەی سپایكەر 1566 كەسە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ