رووداو دیجیتاڵ
بۆ یەکەمجار لە بەغدا، کۆلیژی نموونەیی بۆ بەهرەداران دەکرێتەوە، کە کۆمەڵێک تایبەتمەندیی هەیە و بە نمرەی بەرز خوێندکاران وەردەگرێت. گوتەبێژی وەزارەتی خوێندنی باڵا و توێژینەوەی زانستیی عێراق دەڵێت، خوێندکارانی هەرێمی کوردستان دەتوانن داواکاری پێشکێش بکەن.
د. حەیدەر عەبوودی، گوتەبێژی وەزارەتی خوێندنی باڵا و توێژینەوەی زانستی عێراق، یەکشەممە 02-02-2025 بە تۆڕی میدیایی رووداوی راگەیاند، بۆ یەکەمینجار لە بەغدا، کۆلیژی نموونەیی بۆ بەهرەدارن دەکرێتەوە و بۆ ساڵی 2025-2026 دەخرێتە نێو رێبەری وەرگرتنی خوێندنکارانەوە لە زانکۆ و پەیمانگەکان.
خوێندن لە کۆلێژەکە بە زمانی ئینگلیزی دەبێت، خوێندکارانی ئەو کۆلیژە کۆمەڵێک تایبەتمەندیان پێدەدرێت، لەوانە مانگانە لانیکەم 200 هەزار دیناریان پێدەرێت، کورسیی ماستەر و ئاسانکاریان بۆ دەکرێت تاوەکو دابمەزرێن و لە دەرەوە وڵاتیش دکتۆرا بخوێنن.
یەکێک لە مەرجەکانی وەرگرتنی خوێندکاران لەو کۆلیژە، بۆ کوڕان نمرەی 90 و بۆ کچانیش 95ـە. بەگوتەی گوتەبێژی وەزارەتی خوێندنی باڵا، کچان لە پۆلی شەشی ئامادەیی نمرەی بەرزتر لە کوڕان دەهێنن، بۆیە بۆ کوڕان 90 و بۆ کچان 95 دیاریکراوە.
کۆلیژەکە لە چوارچێوەی زانکۆی بەغدا دەبێت و لە پێنج بەش پێکدێت: زانستی داتاکان، سیستمی زانیاری، زانستی کارگێڕیی کار و بازرگانیی ئەلیکترۆنی، زانستی ژمێریاری و بانکەکان و زانستی کۆمەڵناسی و فەلسەفە.
سەبارەت بە وەرگرتنی دەرچووانی ئامادەیی هەرێمی کوردستان لە کۆلێژەکەی بەغدا، گوتەبێژی وەزارەتی خوێندنی باڵای گوتی، "خوێندکارانی هەرێمی کوردستانیش دەتوانن داواکاری پێشکێش بکەن بۆ ئەوەی لەو کۆلیژە بخوێنن."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ