رووداو دیجیتاڵ
گوتەبێژی فەرماندەیی گشتیی هێزە چەکدارەکانی عێراق لە راگەیێندراوێکدا دەڵێت، هێرشەکانی ئەمریکا پێشێلکردنی سەروەریی عێراقن و هەوڵەکانی حکومەتی عێراق بۆ دەستەبەرکردنی ئاسایش و سەقامگیری ناوچەکە تێکدەدات. ئەمریکاش دەڵێت، پێشتر عێراقیان لە هێرشەکە ئاگادارکردووەتەوە.
بەرەبەیانی شەممە، 3-2-2024، فەرماندەیی ناوەندیی هێزەکانی ئەمریکا – سێنتکۆم بڵاویکردەوە، "کاژێر 12:00ـی شەو (بەکاتی هەولێر) هێزەکانمان چەند هێرشێکیان لە عێراق و سووریا کردە سەر سوپای پاسدارانی ئێران و گرووپە میلیشیاکان."
سێنتکۆم هەروەها دەڵێت، "85 شوێن لە عێراق و سووریا کراونەتە ئامانج و چەند فڕۆکەیەکیش لە ئەمریکاوە فڕیون و 125 مووشەکیان تەقاندووە و هێرشەکان لە رێگەی ژمارەیەک فڕۆکەی بۆمبهاوێژی دوورمەوداوە کراون."
لەمبارەیەوە لیوا یەحیا رەسوول، گوتەبێژی فەرماندەی گشتیی هێزە چەکدارەکانی عێراق راگەیێندراوێکی بڵاوکردەوە و تێیدا هاتووە: "شارەکانی قائیم و ناوچە سنوورییەکانی عێراق لەلایەن فڕۆکەکانی ویلایەتە یەکگرتووەکانی ئەمریکاوە هێرشی ئاسمانییان دەکرێتە سەر."
لیوا یەحیا رەسوول رایگەیاندووە: "ئەم هێرشانە لە کاتێکدایە، عێراق هەوڵەکانی چڕ کردووەتەوە لەپێناو زامنکردن و دەستەبەرکردنی ئاسایش و سەقامگیری ناوچەکە."
دەشڵێت: "ئەم هێرشانە، پێشێلکردنی سەروەریی عێراقن، تێکدانی هەوڵەکانی حکومەتی عێراقن و هەڕەشەیەک پێکدەهێنن کە عێراق و ناوچەکە بەرەو دەرئەنجامە پێشبینینەکراوەکان پەلکێش دەکات، کە لێکەوتەکانی کارەساتبار دەبن بۆ سەر ئاسایش و سەقامگیریی عێراق و ناوچەکە."
لەلایەکی دیکەوە، جۆن کێربی، گوتەبێژی ئەنجوومەنی ئاسایشی نیشتمانیی ئەمریکا رایگەیاند، پێش هێرشەکە حکومەتی عێراقیان ئاگادارکردووەتەوە.
لەبارەی ئەو شوێنانەی کراونەتە ئامانج، سێنتکۆم رایگەیاند، "ناوەندەکانی فەرمان و کۆنترۆڵی ئۆپەراسیۆنەکان، ناوەندەکانی هەواڵگری، کۆگەکانی رۆکێت، مووشەک و درۆن و دامەزراوەکانی تایبەت بە لۆجیستیی گرووپە میلیشیاکان و ئەوانەی سەر بە سوپای پاسدارانی ئێرانن کە پیلانیان بۆ هێرشەکانی دژی ئەمریکا و هێزەکانی هاوپەیمانان داڕشتبوو."
هاوکات لۆید ئۆستن، وەزیری بەرگریی ئەمریکا لەبارەی دوایین هێرشەکانی وڵاتەکەی بۆ سەر سووریا و عێراق رایگەیاند، "ئەو هێرشانە لەدوای کوژرانی سێ سەربازمان بە فەرمانی سەرۆکی ئەمریکا کران و زیاتر لە 85 شوێنمان کردە ئامانج کە سوپای پاسدارانی ئێران و گرووپەکانی نزیک لێی لە دژی ئەمریکا بەکاریان هێنابوو."
لۆید ئۆستن رایگەیاند، "ئەمە سەرەتای وەڵامی ئێمەیە و سەرۆک بڕیاریداوە هەنگاوی زیاتر بنرێت بۆ ئەوەی سوپای پاسدارانی ئێران و گرووپەکانی سەر بە ئەوان رووبەڕووی بەرپرسیارێتی بکرێنەوە لەسەر ئەو هێرشانەی کردیانە سەر ئەمریکا و هێزەکانی هاوپەیمانان."
جۆ بایدن، سەرۆکی ئەمریکاش لە راگەیێندراوێک گوتی، "ئەمریکا لە رۆژهەڵاتی نێوەڕاست یان هیچ شوێنێکی دیکەی جیهان بە دوای ململانێیەوە نییە، بەڵام هەموو ئەوانەی هەوڵدەدەن زیانمان پێ بگەیێنن با بزانن، ئەگەر زیان بە ئەمریکییەک بگەیێنن، وەڵاممان دەبێت."
وەزیرەکەی ئەمریکا لە کۆتایی راگەیێندراوەکەی دەڵێت، "چاوپۆشیی لە هێرشکردنە سەر هێزەکانی ئەمریکا ناکەین و هەموو هەنگاوێک دەنێین بۆ پاراستنی ئەمریکا، هێزەکانمان و بەرژەوەندییەکانمان."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ