وەزارەتی پەروەردەی عێراق وانەی "پەروەردەی ئەخلاقی" زیاد دەکات

 

 

کەریم سەیید، گوتەبێژی وەزارەتی پەروەردەی عێراق، ئەمڕۆ یەکشەممە بە تۆڕی میدیایی رووداوی راگەیاند، "لە ساڵی خوێندنی 2024 - 2025دا وانەیەکی نوێ بەناوی پەروەردەی ئەخلاقی بۆ هەردوو قۆناخی یەکەمی سەرەتایی و یەکەمی ناوەندی زیاد دەکرێت."

 

گوتەبێژی وەزارەتی پەروەردەی عێراق گوتی، "مەبەست لەو وانەیە پەروەردەکردن و پێگەیاندنی نەوەیەکی دەستگرتووە بە بنچینە، بەها و پرەنسیپە ئایینی و کۆمەڵایەتییە رەسەنەکانەوە؛ بۆئەوەیە نەوەیەکی دوور لە مامەڵەی دەمارگیری و جیاکاری پەروەردە بکرێت."

 

بە گوتەی کەریم سەیید، "پەرتووکی ئەو وانەیە لەلایەن ژمارەیەک پسپۆڕ و مامۆستای شارەزا لە بەڕێوەبەرایەتیی گشتیی پرۆگرامەکان بە هاوئاهەنگیی رێکخراوە نێودەوڵەتییەکانی پەیوەندیدار بەو بوارە ئامادە کراوە."

 

کەریم سەیید ئاماژەی بەوەش کرد، لە ساڵانی داهاتوودا وانەکە بۆ قۆناخەکانی دیکەی خوێندنیش زیاد دەکرێت.