ئاوەدانکردنەوەی عێراق: بەهۆی بێ پلانیی حکومەتەکانی پێشوو 70٪ـی عێراقییەکان بوون بە شارنشین

 

 

نەبیل سەفار، گوتەبێژی وەزارەتی ئاوەدانکردنەوە و نیشتەجێکردنی عێراق بە تۆڕی میدیایی رووداوی گوت: "ئەو جەنگ و قەیرانە هەمەجۆرانەی بە درێژایی ساڵانی رابردوو رووبەڕووی عێراق بوونەتەوە، وایکردووە خەڵکی گوندەکان بەرەو ناوەندی شارەکان کۆچ بکەن، کە ئێستا 70٪ـی دانیشتووانی عێراق لە شارەکاندا دەژین."

 

گوتیشی: "لە ساڵانی پێشوودا بەرپرس و سەرمایەداران زەوییە کشتوکاڵییەکانیان دەکڕی و دواتر دەیانفرۆشت بەو هاونیشتمانیانەی کە کرێچین و پێویستیان بە یەکەی نیشتەجێبوونە، هۆکاری ئەوەش نەبوونی پلانی حکومەتەکانی پێشووی پاش 2003 بوو، جگە لەو پێشێلکارییە گەورانەی کە لەسەر زەوییەکانی دەوڵەت کراون."

 

سەبارەت بەوەی ئاخۆ ئەم کابینەیەی حکومەتی عێراق چۆن دەتوانێت کێشەکانی رابردووی نیشتەجێبوون چارەسەر بکات، گوتەبێژی وەزارەتی ئاوەدانکردنەوە و نیشتەجێکردن دەڵێت، "حکومەت دەستیکردووە بە دروستکردنی چەندین شاری نیشتەجێبوون، کە سەرجەمیان لە دەرەوەی سەنتەری پارێزگاکان دان، ئەوەش بۆ کەمکردنەوەی قەرەباڵخی شارەکانە."

 

لە 26ـی ئابی ئەم ساڵ، حکومەتی عێراق بڕیاریدا بە هاوبەشی لەگەڵ وڵاتی تورکیا؛ 13 پڕۆژەی بەنداو و ئاودێریی دروستبکات، نەبیل سەفار ئاماژە بەوە دەدات، "لە زۆرینەی پارێزگاکان کار لەسەر 26 پڕۆژەی تایبەت بە دابینکردنی ئاوی خاوێن بۆ هاونیشتمانیان و ئاودێری بۆ زەوی و زارەکان دەکات، ئەم ساڵیش توانیویانە 8 پڕۆژەی دابینکردنی ئاوی خاوێن تەواو بکەن، ئەو پڕۆژانە زۆر گرنگن بۆ بووژانەوەی زەوییە کشتوکاڵییەکانی عێراق و گەڕانەوەی گوندنشینان بۆ زێدی خۆیان."

 

سەرژمێریی 1997 بەبێ پارێزگاکانی هەرێمی کوردستان بوو. لە دوایین سەرژمێریدا ژمارەی دانیشتووانی عێراق گەیشتە 19 ملیۆن و 184 هەزار و 534 کەس. کە ئێستا بە سەروو 42 ملیۆن دەخەمڵێندرێت.

 

وابڕیارە سەرژمێری گشتیی دانیشتووان لە 20ـی تشرینی دووەمی ئەم ساڵ بکرێت.

 

بەپێی پێشبینییەکانی وەزارەتی پلاندانانی عێراق، ژمارەی دانیشتووانی عێراق لە ساڵی 2030دا دەگاتە 51 ملیۆن و 211 هەزار و 700 کەس.