جارێکى دیکە لە پەرلەمان واژۆ بۆ کشاندنەوەى هەموارى یاساى بارى کەسى کۆدەکرێتەوە

 

 

سروە محەممەد، جێگرى سەرۆکى لیژنەى ژن و خێزان و منداڵان لە پەرلەمانى عێراق بە تۆڕى میدیایی رووداوى گوت: "ئەو واژۆ کۆکردنەوەیە ئەمڕۆ دەستىپێکرد و ژمارەیەک لە ژنە پەرلەمانتارەکان سەرپەرشتى دەکەن، بەشێک لە  پەرلەمانتارە پیاوەکانیش واژۆیان کردووە و ئەوەى ئاگادارم گەیشتووەتە زیاتر لە 85 واژۆ" .

 

پێشنیازە یاسای هەمواری یاسای باری کەسی لەلایەن رائید مالیکی، پەرلەمانتاری سەربەخۆ ئامادە کراوە و زۆرینەى پەرلەمانتارە شیعەکان پاڵپشتى دەکەن. پەرلەمان 4ى ئاب خوێندنەوەى یەکەمى بۆ کرد وەک هەنگاوى یەکەم بۆ پەسندکردنى.

 

تێبینیی سەرەکیی رێکخراوەکان لەسەر ئەو هەموارە بە شوودانى کچە لە تەمەنێکى بچووک و گرێبەستى هاوسەرگیرییە لە دەرەوەى دادگە.

 

سروە محەممەد گوتى: "واژۆ کۆکردنەوەکە بۆ ئەوەیە کە بەیەکجارى ئەوپێشنیازە یاسایە بکشێندرێتەوە وەک چۆن پێشتر واژۆ کۆکرایەوە بۆ ئەوەى نەخرێتە خشتەى کارى کۆبوونەوەکانى پەرلەمان" .

 

هەموارەکە رێگە بەوە دەدات هاوژینان ئەو مەزهەبە دیاری بکەن کە دەیانەوێت لەسەر بنەماکانى گرێبەستى هاوسەرگیرییەکەیان بکەن، سزاى هاوسەرگیریى دەرەوەى دادگەکانیش ناهێڵێت.

 

جێگرى سەرۆکى لیژنەى ژن و خێزان و منداڵان لە پەرلەمانى عێراق گوتى: "پێشنیازە یاساکە لە لیژنەى یاساییە، بەڵام پێویستى بە پێشنیازى لیژنەکەى ئێمەیە، ئێمەش کۆبوونەوەمان لەسەرى نەکردووە، خۆشم لەسەر ئەو پرسە بایکۆتى کۆبوونەوەى لیژنەم کردووە" .