وەزارەتی تەندروستیی ئێران هۆشداری لە کاریگەرییەکانی بەرزیی پلەی گەرما دەدات

سەعید کەریمی، جێگری وەزیری تەندروستیی ئێران دەڵێت، "منداڵانی خوار 4 ساڵ و بەساڵاچووانی سەروو 65 ساڵ؛ هەروەها ئەو کەسانەی کە نەخۆشیی دڵ، شەکرە و پەستانی خوێنیان هەیە، مەترسی ئەوەیان لەسەرە بەهۆی بەرزیی پلەی گەرماوە نەخۆش بکەون. هەربۆیە دەبێت ئاگاداری خۆیان بن".

 

سەعید کەریمی ئەمڕۆ دووشەممە گوتی، هەموو بنکە تەندروستییەکان و نەخۆشخانەکان لە ئامادەباشییدا دەبن بۆ چارەسەرکردنی نەخۆشەکان و ئاماژەی بەوەشکرد، ئەگەر هاووڵاتییان "نیشانەکانی گەرمابردنیان هەبوو، پێویستە سەردانی فریاکەوتنی خێرا و پزیشک بکەن."

 

جێگری وەزیری تەندروستیی ئێران گوتی، "بێهێزی، لاوازی، تینوێتیی زۆر، دابەزینی پەستانی خوێن و بوورانەوە لە نیشانە سەرەکییەکانی گەرمابردنن."

 

بۆ رێگەگرتنیش لە گەرمابردن، سەعید کەریمی داوای لە خەڵک کرد، "ئاو و شلەمەنییەکانی زۆر بخۆنەوە و لە شوێنی فێنکدا بمێننەوە."

 

کەشناسیی ئێران پێشبینی کردووە، لە رۆژی سێشەممەوە شەپۆلێکی گەرما بەشی زۆری رۆژهەڵاتی کوردستان و ئێران بگرێتەوە کە تاوەکو رۆژی شەممەی داهاتوو بەردەوام دەبێت.